E diela e 7 qershorit mbase nuk i gjen në Kosovë.
Por banorët rezident mund ta shfrytëzojnë të drejtën për votë, edhe nëse rastisin të jenë në vizita të përkohshme jashtë vendit.
Komisioni Qendror i Zgjedhjeve u ka hapur rrugë edhe atyre që ndonëse jashtë kufijve përkohësisht, duan të jenë pjesë e procesit zgjedhor.
Aplikimi është pothuajse sikur për mërgatën, veçse duhet pasur kujdes në detaje.
“Procedura e regjistrimit është e njëjtë pra si ajo për shtetasit e Kosovës që jetojnë jashtë vendit, vetëm se në rubrikën ku kërkohen dokumentet e nevojshme për regjistrim, aplikuesi duhet ta paraqesë dokumentin që dëshmon adresën e personit ku qëndron përkohësisht ose dëshmi tjetër banimi si rezervim hoteli, konvikt apo të ngjashme”, tregon Valmir Elezi, zëdhënës i KQZ-së
E edhe votimin mund të zgjedhin se si ta bëjnë.
“Mund të votojnë në përfaqësi diplomatike apo përmes postës, në momentin e regjistrimit votuesit qoftë ata që jetojnë jashtë vendit por edhe ata që janë përkohësisht, në momentin e regjistrimit mund të zgjedhin edhe mënyrën e votimit në përfaqësi diplomatike apo përmes postës”, shpjegon Elezi.
Ndërkaq, për tu regjistruar, kanë afat deri me datë 17 të këtij muaji.
