Në vendet e rajonit, Kosova sipas hulumtimeve është renditur e fundit sa i përket procesit të integrimit evropian.
Kjo për shkak të zgjedhjeve parlamentare të vazhdueshme.
Kështu u tha në tryezën rajonale “Pasqyrimi rajonal, ku qëndron rajoni në grup kapitullin e parë të BE-së”, e organizuar nga Instituti i Kosovës për Drejtësi, së bashku me Qendrën për Studimin e Demokracisë dhe Qeverisjes nga Shqipëria dhe Qendrën për Gazetari Hulumtuese (SCOOP) nga Maqedonia e Veriut.
Drejtori ekzekutiv i IKD-së, Ehat Miftaraj tha se nuk ka vullnet politik që të bëhen institucionet funksionale pas zgjedhjeve që ta kenë prioritet integrimin evropian.
“Fatkeqësisht Kosova është thënë në raport, është vendi i fundit në rajon të Ballkanit Perëndimorë sa i përket procesit të integrimit evropian. Është bërë modë qe Kosova të organizoj zgjedhje të lira demokratike. Jemi liderë të Ballkanit Perëndimorë dhe në Evropë. Të cilat pranohen nga të gjitha partitë politike, përshëndeten nga partnerët ndërkombëtarë, por pastaj nuk po kemi vullnet politik t’i përkthejmë institucionet përgjegjëse në institucione funksionale të cilat do ta kishin prioritet integrimin evropian”, tha ai.
Ndërsa nga Shqipëria, drejtori ekzekutiv i CSDG-së Arjan Dyrmishi shtoi se për të qenë një shtet i suksesshëm duhet të kontrollojë financat.
“Është një projekt që ne në Shqipëri, kemi filluar zbatimin që nga viti 2021, në reflektim të ndryshimit të metodologjisë për anëtarësim në BE, ndarjen në grup kapituj.. Ka pasur moto qe të ndjekim nga afër pikërisht ecurinë e procesit të afrimit të Shqipërisë në raport me këtë grup kapitull. Metodologjia e angazhimit tregon se grup kapitullit të parë grumbullohen gjashtë kapituj.. Nëse një shtet nuk i kontrollon si duhet financat e veta nuk mund të jetë i suksesshëm. Statistika se si do ta masin suksesin, prokurimet publike dhe drejtësia e siguria. Këto janë elementet thelbësore të shtetit”, shtoi Dyrmishi.
Nga Maqedonia e Veriut, drejtori i SCOOP Goran Levkov tha se situata është zhgënjyese në institucionet e Ballkanit Perëndimor për të përmbushur të gjitha standardet dhe kriteret.
Ai tha se duhet të ecin se bashku si rajon që të bëhen pjesë e BE-së, duke ndërtuar kapacitetet e organizatave, kapacitetet e shoqërisë dhe kapacitetet e njerëzve për ta kaluar këtë rrugë.
“Maqedonia e Veriut po pret në “dhomën” e anëtarësimit ndoshta për kohën më të gjatë; mbase vetëm Turqia ka pritur më gjatë. Kosova sapo po e nis këtë proces, por ajo që duhet të kalojmë në fund është se duhet të ecim së bashku si rajon.. Ne duhet të ndërtojmë kapacitetet e organizatave, kapacitetet e shoqërisë dhe kapacitetet e njerëzve për ta kaluar këtë rrugë. Kur dëgjojmë politikanët, ata vazhdimisht thonë se nuk ka vullnet të mirë nga Bashkimi Evropian për zgjerim, se mungon kjo apo ajo. Por kur shohim kushtet në institucionet tona për të përmbushur të gjitha standardet dhe kriteret që duhet të kalojmë, atëherë situata është shumë më zhgënjyese aty”, tha Levkov.
