Kryetari i Lidhjes Demokratike të Kosovës, ka deklaruar se Lëvizja Vetëvendosje, përmes seancës së jashtëzakonshme për zgjedhjen e Presidentit, ka iniciuar përmbysjen e rendit kushtetues dhe demokratik të Kosovës.
Ai e ka cilësuar këtë si sabotim të Kushtetutës dhe institucioneve të vendit, duke shtuar se përgjegjësia bie mbi ata që, sipas tij, tentuan një veprim të tillë.
Sipas Abdixhikut, LDK-ja do të vazhdojë ta mbrojë rendin kushtetues me çdo mjet.
“Sonte, pas dy seancash, është një natë e rëndë për Republikën e Kosovës, meqenëse Lëvizja Vetëvendosje inicioi përmbysjen e rendit kushtetues dhe rendit demokratik. Një rast i paprecedent, një dhunim kushtetues për shtetin tonë të ri. Ky sabotim i kushtetutës, i institucioneve të Republikës, ka përgjegjësi të lartë dhe këtë përgjegjësi të lartë do ta mbajnë ata që tentuan dhe iniciuan përmbysjen e tillë. LDK-ja analizon dhe vlerëson edhe vazhdon ta mbrojë idenë e saj, meqenëse kurrë nuk e kemi pranuar këtë sforcim të rregullit minimal, është rasti i paprecedent siç ka qenë edhe herën e kaluar seanca e 5 prillit. Si të tillë e dënojmë dhe natyrisht do ta mbrojmë me çdo mjet, çdo kënd, meqenëse kushtetuta e Republikës së Kosovës dhe vetë Republika e Kosovës është e panegociueshme në këtë pikë”, ka thënë ai.
Abdixhiku ka theksuar se qëndrimi i LDK-së mbetet i pandryshueshëm, duke përsëritur se zgjedhja e Presidentit duhet të bëhet përmes një marrëveshjeje politike dhe jo përmes veprimeve të njëanshme.
Sipas Abdixhikut, veprime të tilla monopartiake nuk i shërbejnë demokracisë dhe mund ta çojnë vendin drejt zgjedhjeve të reja, për shkak të mungesës së kompromisit politik.
“Natyrisht që ju e dini tashmë qëndrimin e Lidhjes Demokratike të Kosovës, është i pandryshueshëm, është konsistent që nga dita e parë deri tani. Madje Lëvizja Vetëvendosje është zotuar që nga takimi i parë që nuk do të ketë kandidatura të imponuara siç i kemi pasur katër kandidatura deri tani. LDK-ja ka bërë thirrje, përsërit thirrje vazhdimisht, që e vetmja mënyrë për të zgjedhur presidentin e ardhshëm të Republikës së Kosovës është nëpërmjet një marrëveshjeje politike. Dhe për këtë marrëveshje politike kemi pasur një propozim, kemi pasur një zotim, kemi pasur një qëndrim, të cilin Lëvizja Vetëvendosje nuk e ka konsideruar të denjë ta respektojë. Prandaj, këto janë veprime shpërfillëse, monopartiake, që nuk i shërbejnë demokracisë, nuk janë të denja për Republikën e Kosovës dhe po na dërgojnë drejt zgjedhjeve të reja të radhës, për shkak se një parti politike nuk e kupton kompromisin”, është shprehur Abdixhiku./teve1.info/
