Shefja e Grupit Parlamentar të Lëvizjes Vetëvendosje, Arbërie Nagavci, ka deklaruar se nuk ka pasur hapa seriozë nga partitë tjera lidhur me procesin e zgjedhjes së presidentit.
Para fillimit të seancës për zgjedhjen e presidentit, Nagavci ka folur për qëndrimin e subjektit të saj ndaj propozimit të Lidhjes Demokratike të Kosovës për kandidaten Vjosa Osmani.
Ajo ka theksuar se deklaratat për sigurimin e nënshkrimeve nuk janë të mjaftueshme dhe se ato duhet të konfirmohen zyrtarisht në Kuvend.
“Përtej deklarimeve se i kanë 15 nënshkrime, ato duhet të shihen. Unë i kam të gatshme nënshkrimet edhe për seancë edhe për president. Kam pritur gjatë fundjavës që të më ofrohen 15 nënshkrimet, në mënyrë që të plotësojmë edhe pjesën tjetër. Nuk ka asnjë hap serioz dhe diskutimi duhet të bëhet në Kuvend. Sikur t’i kishim nënshkrimet dhe propozimet tjera, ne do të tërhiqnim kandidaturat e deputetëve tanë”, ka thënë Nagavci.
Ajo ka sqaruar gjithashtu arsyen pse LVV-ja ka kërkuar nga PDK-ja dhe LDK-ja që të propozojnë nga tre kandidatë për president.
Sipas saj, kjo do të mundësonte përfshirjen e të gjitha partive në proces dhe shmangien e zgjedhjeve të reja.
“Arsyeja pse kemi kërkuar nga tre kandidatë është që edhe PDK edhe LDK të bëhen pjesë e zgjedhjes së presidentit dhe të mundësohet sigurimi i nënshkrimeve të deputetëve shqiptarë. Do të ishte e pamundur të kishim katër kandidatë, pasi do të duheshin 120 nënshkrime. Në këtë mënyrë do të shmangnim zgjedhjet e reja, pasi në votim do të merrnin pjesë së paku 80 deputetë”, është shprehur ajo.
