Deputeti i Lëvizjes Vetëvendosje, Adnan Rrustemi, ka akuzuar partitë opozitare për mungesë reflektimi dhe për vazhdim të së njëjtës qasje politike si vitin e kaluar.
Sipas tij, opozita nuk ka ndryshuar qëndrimet thelbësore për bllokim, por vetëm mënyrën e komunikimit në publik.
“Jam i bindur që opozita nuk ka bërë asnjë ndryshim e asnjë reflektim në raport me vitin e kaluar. Për mua është në planin e njëjtë e në synimet e njëjta, e ka ndryshuar vetëm gjuhën edhe sjelljet me impakt publik”, deklaroi ai në emisionin “Këndi i Debati” në Tëvë1.
Ai theksoi se refuzimi i ofertave për bashkëqeverisje, përfshirë katër ministri dhe postin e zëvendëskryeministrit, tregon se opozita nuk është e interesuar për ndarjen e përgjegjësive në qeverisje.
“Këta nuk duan as pushtet në bashkëpunim me VV-në, prandaj i refuzojnë katër ministri dhe zëvendëskryeministrin. Nuk duan pushtet me VV-në, këta duan që VV-ja të mos jetë në pushtet, Albin Kurti të mos jetë kryeministër”, deklaroi ai.
Sipas tij, pas zgjedhjeve të 28 dhjetorit, kur rezultati nuk përputhej me pritjet e opozitës, kjo e fundit ka ndryshuar vetëm taktikën e komunikimit, por jo qëllimet politike.
Ai shtoi se, ndonëse tashmë opozita merr pjesë në takime, nuk ka shenja konkrete për ndryshim të qëndrimeve apo gatishmëri për bashkëpunim.
“Vitin e kaluar e kanë pasur të njëjtin plan, duke penguar konstituimin e Kuvendit dhe krijimin e qeverisë dhe duke refuzuar bashkëqeverisjen edhe vitin 2025 dhe kam shpresuar që në zgjedhjet që e pasuan atë krizë LVV do ta zbresin nën 40 deputetë që pastaj me pasë mundësinë me krijua edhe qeverinë… kur rezultati i 28 dhjetorit doli ndryshe nga që kishin menduar … e ndryshuan pastaj vetëm taktikën e komunikimit. Vitin e kaluar nuk na vinin as në takime, se për bashkëpunim nuk bëhej fjalë – por pas rezultateve të zgjedhjeve të 28 dhjetorit po na vijnë në takime, por s’e kanë ndryshuar në asnjë mënyrë planin dhe synimin e tyre”, tha ai.
