Ministrja e Drejtësisë, Donika Gërvalla, në seancën e Kuvendit ka deklaruar se projektligji për Byronë Shtetërore për Verifikimin dhe Konfiskimin e Pasurisë së Pajustifikueshme është i ndërtuar për të rritur llogaridhënien dhe nuk cenon qytetarët e zakonshëm.
Ajo ka theksuar se “pozicioni publik nuk është justifikim për pasurim të paligjshëm”, duke shtuar se Byroja nuk konfiskon dhe nuk gjykon, por vetëm mbledh e analizon të dhëna, ndërsa vendimin përfundimtar e merr gjykata.
Sipas saj, procedurat nisin vetëm mbi bazë të informatave kredibile dhe të drejtat e palëve janë të garantuara në çdo fazë.
“Nuk është shkruar për të prodhuar artikuj por për të prodhuar llogaridhënie. Kjo nismë nuk ka ardhur rastësisht. As Komisioni i Venecias as gjykata nuk e kanë kontestuar.. këto rekomandime janë reflektuar në tekstin që sot e paraqesim para jush. Sot e kemi një projektligj që ka qëndruar gjatë tepër gjatë ne sirtarët e gjykatës. Por edhe ka kaluar nëpër filtra… byroja nuk konfiskon, nuk gjykon, nuk i zëvendëson gjykatat, byroja mbledh verifikon dhe analizon informacionin, konfiskimin e bën gjykata. Ky ligj nuk merret me qytetarin e zakonshëm por me zyrtarët publikë”, u shpreh ajo nga foltorja e Kuvendit.
Gërvalla u bëri thirrje deputetëve që ta votojnë projektligjin, duke thënë se Qeveria e ka miratuar për herë të tretë dhe kjo tregon përkushtim për reformë.
“Qytetari i zakonshëm nuk është objekt i këtij ligji. Procedurat nuk nisin arbitrarisht por mbi bazë të informatave kredibile. Të drejtat e palëve janë të garantuara në çdo fazë. Ky projektligj është ndërtuar mi logjikën e përgjegjësisë provës kontrollit gjyqësor dhe interesit publik. Qeveria e ka miratuar për herë të tretë kjo tregon se nuk ka pasur zmbrapsje”, ka shtuar ajo.
Ndërkohë, opozita ka shprehur rezerva ndaj projektligjit.
PDK ka deklaruar se do të abstenojë, duke kërkuar më shumë konsultime dhe adresim të vërejtjeve kushtetuese e teknike, ndërsa LDK ka thënë se do ta mbështesë vetëm nëse bëhen ndryshime që garantojnë qartësi dhe pavarësi më të madhe të mekanizmit.
