Deputetja e PDK-së, Ganimete Musliu ka kërkuar respektimin e standardeve ligjore e institucionale e mbi të gjitha respektimin e gjuhës shqipe nga Kuvendi i Kosovës.
Musliu në seancën e kuvendit, tha se janë duke e cenuar drejtpërdrejtë rendin kushtetues duke mos i përkthyer dokumentet në gjuhën shqipe.
“Mbrëmë deri në ora 1:30 pas mesnate punuam në komisionin AD HOC për zgjedhjen e anëtarëve të bordit të RTK-së, ndërsa sot jemi ftuar në ora 9:00 për të proceduar me zgjedhjen e anëtarëve të komisionit pavarur mbikëqyrës të mediave, sikur në të parën me procedura të përshpejtuara pa respektuar afatet dhe rregulloren e kuvendit çka është kjo nguti, ku jeni nis të nderuar? Nuk po respektoni asnjë standard minimal institucional. Pse nuk po jepni afat me përkthye dokumentet as në gjuhën shqipe ashtu siç e përcakton ligji e Kushtetuta. A e dini se po e cenoni drejtpërdrejtë rendin kushtetues për përdorim të gjuhëve në republikën e Kosovës. Kjo nuk është neglizhencë, është degradim i kuvendit si institucion, i cili po shndërrohet në një mekanizëm formal pa dinjitet dhe pa respekt për deputetët”, tha ajo.
Ajo tha se ky është një degradim i gjuhës shqipe, duke e cilësuar si qasje të rrezikshme që ul rëndësinë e gjuhën shqipe dhe kuvendin në nivelin e një institucioni që nuk respekton as vetën.
“Është degradim i gjuhës shqipe, një prej shtyllave themelore të identitetit shtetërorë. Si është e mundur që deputetët detyrohen të shqyrtojnë materialet që nuk janë të përkthyera në gjuhën zyrtare, si është e mundur që standardet elementare parlamentare të injorohen në këtë mënyrë. Kjo është një qasje e rrezikshme që relativizon rëndësinë e gjuhës shqipe dhe ul kuvendin në nivelin e një institucioni që nuk respekton as vetën. Nëse sot heshtim për gjuhën nesër do të na mungoj edhe shteti”, tha Musliu.
