Deputeti i Aleancës për Ardhmërinë e Kosovës, Besnik Tahiri, i ka bërë thirrje Qeverisë së Kosovës dhe Ministrisë së Mbrojtjes që të kompensojnë ushtarët për orët shtesë të punës.
Gjatë fjalimit të tij në seancën plenare të Kuvendit, Tahiri ka kritikuar faktin që, sipas tij, çështja e moskompensimit të ushtarëve po përfundon në gjykata, duke e cilësuar këtë si një situatë të padrejtë dhe të vështirë për pjesëtarët e Forcës së Sigurisë së Kosovës.
“Si ka mundësi që ministria të mos i kompensojë ushtarët tanë për orët shtesë dhe një çështje e tillë të bëhet subjekt i trajtimit në gjykata. Kjo është një nga pozitat më të vështira kur një person në uniformë detyrohet ta kërkojë të drejtën e vet në gjykatë,” u shpreh Tahiri.
Ai i bëri thirrje Qeverisë që ta trajtojë seriozisht këtë çështje dhe të sigurojë kompensimin e duhur për ushtarët, duke theksuar se ata nuk duhet të detyrohen të kërkojnë të drejtat e tyre përmes procedurave gjyqësore.
