Klubi i basketbollit Bashkimi ka dënuar incidentin e mbrëmshëm në palestrën e sportit “Sezai Surroi” në Prizren, ku me një mjet u godit në kokë basketbollisti i KB GO+Peja, Dardan Berisha.
Ky incident i qiti hije të keqe sfidës së parë të çerekfinales së Kupës së Kosovës, mes Bashkimit dhe GO+Peja.
Bashkimi ka reaguar për turpin e madh.
“Të nderuar tifozë portokall e zi, të nderuar qytetarë të Prizrenit,
Përkrahja dhe përkushtimi juaj e bëjnë palestrën “Sezai Surroi” një nga ambientet sportive më të mira në Kosovë.
Megjithatë, klubi është i detyruar të rikujtojë rregullat bazë të sjelljes gjatë ndeshjeve.
Hedhja e çfarëdo sendi në fushë është rreptësishtë e ndaluar.
Gjatë ndeshjes së fundit janë evidentuar disa raste të hedhjes së sendeve në parket nga individë të papërgjegjshëm, të cilët në numër janë pak, por veprimet e tyre përbëjnë shkelje serioze dhe rrezikojnë shëndetin e lojtarëve, përbëjnë rrezik financiar për klubin dhe mund të çojnë në zbrazjen e sallës.
Shembulli më i mirë për t’u ndjekur janë tifozët tanë Arpagjik’t, të cilët mbështesin klubin në mënyrën më të mirë të mundshme — me pasion, korrektësi dhe pa shkaktuar probleme për klubin.
Ju njoftojmë se kamerat e sigurisë po monitorohen për te identifikuar personin që ka goditur me shkrepës lojtarin e Klubit Go+Peja dhe gjithashtu do të monitorohen në çdo ndeshje tash e tutje .
Çdo person që hedh mjete të forta ose çfarëdo sendi tjetër në fushë do të identifikohet, denoncohet në organet e rendit dhe do t’i ndalohet hyrja në palestër për të gjitha ndeshjet ku luan KB Bashkimi.
Këto veprime dëmtojnë drejtpërdrejt klubin tuaj të zemrës, rrezikojnë shëndetin e lojtarëve dhe cenojnë imazhin e klubit. Klubi pret nga tifozët e tij kulturë sportive, përgjegjësi dhe respekt ndaj lojtarëve, kundërshtarëve dhe gjyqtarëve.
Si klub distancohemi nga ky veprim jo-sportiv në ndeshjen e fundit dhe në pergjithësi distancohemi nga këto veprime të shëmtuara dhe të rrezikshme të personave që nuk i duan të mirën klubit.
KB Bashkimi mbështetet me pasion, por vetëm me respekt dhe disiplinë”, reagon KB Bashkimi.
