Ish-mesfushori i kombëtares së Kosovës, Herolind Shala ka zbuluar detaje për herë të parë, nga koha kur la Shqipërinë për të ardhur te Kosova.
I ftuar në emisionin VAR, në Tëvë 1, Shala ka thënë se ndihej i zhgënjyer për faktin se nuk u mor në Evropianin e Francës 2016, nga selektori i asaj kohe Gianni de Biasi.
Ai përmend ish-përzgjedhësin e Kosovës, Albert Bunjaki, i cili i tha ta pranonte ofertën e Shqipërisë, por me një kusht
Shala i cili ka bërë karrierë, në Norvegji, Ceki e Turqi, zuri vendin shpejt te kombëtarja, por ëndrrat për pjesëmarrje në Euro 2016, ia shoi de Biasi.
Tekniku italian i kishte thënë se pret shumë nga ai, pasi është e ardhmja e mesfushës së kombëtares, por pas Evropianit.
33-vjeçari që ka mbetur pa ekip ka kujtuar kohën kur luante te Kosova dhe ishin afër kualifikimit në Evropianin e vitit 2020, por që sipas tij gjithçka u prish nga pandemia e Covid 19.
Shala në ndeshjen me Zvicrën u nderua nga FFK-ja për kontributin në kombëtare, por që ai ende thotë se ka për t’i dhënë futbollit dhe pret shumë shpejt të kthehet në fushë.
