Avokati, Valdet Hoxha ka vlerësuar se dorëheqja e ish-drejtorit të Policisë së Kosovës, Gazmend Hoxha, pas vrasjes së Arlinda Zekajt është e domosdoshme nga aspekti moral dhe e nevojshme nga ai juridik, por jo e mjaftueshme nga aspekti politik.
Në një intervistë në emisionin “Ditari” në Tëvë1, ai ka thënë se kjo dorëheqje, sipas tij, rrezikon të amortizojë përgjegjësinë e nivelit politik, për të cilën po kërkojnë llogaridhënie edhe protestuesit.
“Dorëheqja e Gazmend Hoxhës nga aspekti moral e quaj të domosdoshme, në aspektin juridik apo ligjor të nevojshëm, ndërsa në aspektin politik jo të mjaftueshëm sepse po vlerësoj që është një dorëheqje që amortizon përgjegjësinë e nivelit politik të cilët po e kërkojnë jo vetëm protestuesit por edhe ndërgjegjja e gjithsecilit. Po besoj që nuk do të jetë dorëheqja e fundit, momentin kur marrim një përgjegjësi publike dhe ndodhin gjëra të cilat kemi qenë përgjegjës të cilët të i shtyjmë përpara që të mos ndodhin për të ndërmarrë veprime që t’i evitojmë ato ngjarje atëherë nuk duhet ta kemi si problem se kush do të vijë pas. Specifikat e këtij rasti e japin një shtysë për një veprim të domosdoshëm shtetëror për ndërtimin e një strategjie të re të veprimit në raport me dhunën në familje”, ka deklaruar Hoxha.
Ai ka theksuar gjithashtu se rasti i vrasjes së Arlinda Zekajt duhet të shërbejë si shtysë për një strategji të re shtetërore në trajtimin e dhunës në familje.
Duke folur për përgjegjësinë e institucioneve, avokati ka kërkuar që të ketë shkarkime, suspendime, hetime dhe dënime, aty ku vërtetohet përgjegjësia.
Hoxha ka shprehur shqetësimin se përgjegjësia mund të kufizohet vetëm te zyrtarët e niveleve më të ulëta, ndërsa niveli më i lartë institucional të shmangë llogaridhënien.
“Pres që do të ketë shkarkime e suspendime në Qendrën Për Punë Sociale në bazë të atij raporti, nuk do të ketë dorëheqje morale do të ketë disa suspendime të zyrtarëve të dorës së dytë dhe tretë dhe do të kamuflohet. Duhet të ketë shkarkime, suspendime e hetime, e dënime për aq sa është e nevojshme, suspendimi nuk paragjykon fajësinë. Vendi ynë nuk vuan për mungesë legjislacioni, problemi është te kompetenca e të emëruarve publik. Ata zyrtarë të jeni të bindur që mund të jenë shumica prej tyre të pafajshëm”, ka thënë ai.
Sipas Hoxhës, Kosova nuk ka mungesë të legjislacionit, por problemi qëndron te kompetenca e personave të emëruar në pozita publike.
Ai ka shtuar se zyrtarët e përfshirë në këtë rast nuk duhet të paragjykohen si fajtorë pa u zhvilluar procedurat përkatëse./teve1.info/
