Paulo Dybala mund të jetë në muajt e tij të fundit si futbollist i Romës. Sulmuesi argjentinas, kontrata e të cilit skadon në fund të këtij sezoni, po e sheh gjithnjë e më të paqartë të ardhmen në “Olimpico”, ndërsa dëshira për t’u rikthyer në vendlindje po bëhet gjithnjë më e fortë.
Sipas gazetarit Ekrem Konur, 31-vjeçari po synon një rikthim romantik në Argjentinë dhe është i etur të bashkohet me Boca Juniors, klubin që e ka ndjekur prej kohësh.
Ky transferim do ta kthente “La Joyan” në Amerikën e Jugut pas më shumë se një dekade në futbollin evropian.
Roma nuk ka marrë ende një vendim për rinovimin e tij, por problemet e shpeshta fizike dhe paga e lartë kanë ngritur dyshime brenda klubit. Pikërisht këto faktorë mund ta shtyjnë Dybalan të ndjekë rrugën e ish-shokut të skuadrës Leandro Paredes, i cili u rikthye te Boca në fillim të verës.
Aktualisht, Dybala po rikuperohet nga një dëmtim në kofshë, në një sezon tjetër të mbushur me pengesa. Lëndimet e vazhdueshme i kanë kushtuar atij edhe thirrjen në kombëtaren argjentinase për ndeshjet e këtij muaji, duke i shtuar ankthin për të ardhmen.
Megjithatë, synimi i tij mbetet i qartë: të rikthehet në formën më të mirë dhe të mbajë gjallë shpresat për të qenë pjesë e “Albiceleste”-s në Kupën e Botës së ardhshme, ndoshta si futbollist i Boca Juniors.
