“Nga LVV-ja kanë besim të plotë se mund të arrijnë votat e nevojshme, por kjo ju takon atyre që t’i bëjnë votat. Mua më takon që të bindem që kanë gjasa dhe mua më kanë bindur që kanë gjasa”
E para e shtetit, Vjosa Osmani u bind që Glauk Konjufca i ka 61 vota për formimin e Qeverisë.
Por si Osmanin, Lëvizja Vetëvendosje nuk po arrin t’i bindë partitë opozitare.
Kryetari i Lidhjes Demokratike të Kosovës, Lumir Abdixhiku po thotë se partia fituese e zgjedhjeve të 14 shkurtit, nuk kanë vota as për mandatarin e dytë, Glauk Konjufcën.
Andaj sipas tij, mandatimi i Konjufcës është humbje kohe.
“Nuk ka asnjë peshë zhvillimi i brendshëm në një parti politike. Për LDK-në ky proces është një lojë politike që ka për synim thellimin e krizës. Koha e axhamive politike ka marrë fund. Politikave të tilla duhet t’u dilet ballë. LDK-ja konsideron se çdo zvarritje e tillë e qëllimshme përbën zgjatje të krizës. Konjufca nuk ka shumicë”, tha kreu i LDK-së të mërkurën.
Abdixhiku e ka krahasuar këtë propozim me sistemin politik monark.
“Ajo çfarë sot na propozohet më shumë se demokracisë i ngjanë monarkisë. Në monarki, mandati trashëgohet, nga babai të i biri, nga Albini te Glauku”, tha ai.
Që nuk e kanë shumicën e thotë edhe njohësi i zhvillimeve politike, Melazim Koci.
Por Koci thotë se mund të ketë Qeveri të pakicës, pasi thotë që disa deputetë mund të kenë votë pro Konjufcës.
E nga Instituti i Kosovës për Drejtësi, mundësinë e dytë që ia dha presidentja Osmani Lëvizjes Vetëvendosje po e shohin si përrallë.
Ehat Miftaraj thotë se presidentja nuk ka bërë shkelje, por po bën llogaritje për postin e saj më vonë.
“Në anën tjetër i pamë partitë politike të gjitha në sinkron prej PDK-së, LDK-së, AAK-së publikisht treguan se nuk kanë vota për Qeverinë Konjufca 1, dhe në këtë rast presidentja nuk është se ka pasur garancë apo bindjen e fortë që LVV-ja ka mundur të bindë që i ka 61 vota për të formuar Qeverinë. Po ajo cka është më evidente është fatkeqësia se në Kosovë, të gjitha pozitat, në këtë rast edhe presidentja më shumë bëjnë kalukilime politike se ku do të jetë pas prillit, se cilat to të jenë interesat e saj puro personale në raport me ndonjë marrëveshje politike me ndonjë parti politike se sa interesat strategjike të Republikës së Kosovës”, vlerëson Miftaraj.
Mandatari i dytë, në këtë rast Glauk Konjufca ka afat ligjor prej 15 ditëve për formimin e Qeverisë së re.
