Artisti Petrit Halilaj u shpall laureat i çmimit prestigjioz Nasher 2027 në Dallas për arritje të jashtëzakonshme në fushën e skulpturës.
Qendra për Skulpturë Nasher i ka akorduar Halilajt një nga vlerësimet më të rëndësishme për veprimtari në këtë medium, më 2 tetor 2025.
Çmimi Nasher 2027, parashikon dhënien e 100 mijë dollarëve, shumë e cila, duke respektuar dëshirën e artistit Halilaj do të shkojë për mbarëvajtjen e Fondacionit Hajde!, të bashkëthemeluar me kuratoren Hana Halilaj.
Artisti Petrit Halilaj ende kujton largimin nga shtëpia e tij në moshën 12 vjeç: Ishte gjatë një kapitulli brutal të Luftës së Kosovës në vitin 1999, kur familja e tij u nis për në një kamp refugjatësh në Shqipëri, pasi trupat serbe i kishin vënë flakën fshatit të tij.
Një psikolog në kamp i rekomandoi Halilajt të ndiqte vizatimin si një mënyrë krijuese, dhe më shumë se dy dekada më vonë, kjo ka krijuar një karrierë të famshme ndërkombëtare në skulpturë.
Gazeta New York Times shkruan se çmimi prej 100 mijë dollarësh vjen pas një sërë ekspozitash të shquara për artistin, duke përfshirë porosinë e vitit të kaluar në çatinë e Muzeut Metropolitan të Artit dhe një ekspozitë personale në muzeun Hamburger Bahnhof në Berlin që u hap në shtator.
Çmimi është një nga më prestigjiozët në artin bashkëkohor, dhe Halilaj tha në një intervistë se kishte ndërmend t’i dhuronte paratë organizatës së tij jofitimprurëse, Fondacionit Hajde!, i cili ka punuar për të rindërtuar Shtëpinë e Kulturës së Kosovës pasi u shkatërrua gjatë luftës.
“Jam i fiksuar pas rihapjes së saj, dhe ky çmim do të shtojë një garanci,” tha artisti, i cili parashikoi se qendra e arteve do të rihapej brenda dy viteve të ardhshme, pothuajse tre dekada pas shkatërrimit të saj.
Çmimi Nasher feston përpjekjet e Halilajt për të vazhduar të bëjë art pavarësisht kundërshtimit.
“Puna e tij është veçanërisht jehonore sot. Si për investimin e saj të thellë në humanitetin e përvojës së jetuar, ashtu edhe për mënyrën se si krijon hapësira takimi që tejkalojnë kufijtë artistikë, kulturorë dhe gjeografikë,” tha Carlos Basualdo, drejtori i Qendrës së Skulpturës Nasher, në një deklaratë.
