Me rastin e 80-vjetorit të themelimit të Teatrit Kombëtar të Kosovës, Posta e Kosovës ka promovuar një pullë të veçantë postare kushtuar historisë dhe kontributit të këtij institucioni në zhvillimin e artit dhe kulturës në vend.
Ministria e Kulturës ka theksuar që ky promovim synon të nderojë trashëgiminë artistike dhe të përjetësojë kontributin e Teatrit Kombëtar në jetën kulturore të Kosovës.
Në ceremoninë e organizuar me këtë rast morën pjesë kryeministri Albin Kurti, ministrja e Kulturës dhe Turizmit, Saranda Bogujevci, kryeshefja ekzekutive e Postës së Kosovës, Nora Rraci, drejtori i Teatrit Kombëtar të Kosovës, Kushtrim Mehmeti, si dhe artistë e artdashës.
Teatri Kombëtar i Kosovës, i themeluar në vitin 1946 në Prizren, ka shënuar tetë dekada veprimtari artistike, duke u shndërruar në një nga institucionet më të rëndësishme të kulturës në Kosovë.
“Ky përvjetor është rast për të nderuar të gjithë ata që, në skenë dhe prapa saj, kanë kontribuar në rrugëtimin e teatrit, duke e mbajtur gjallë krijimtarinë edhe në periudhat më të vështira. Ruajtja e kësaj trashëgimie dhe krijimi i kushteve për zhvillimin e mëtejshëm të teatrit mbeten pjesë e përgjegjësisë sonë ndaj artit dhe artistëve. Urime 80-vjetori Teatrit Kombëtar të Kosovës dhe të gjithë atyre që e kanë bërë këtë histori!”, thuhet në njoftimin e Ministrisë së Kulturës.
Përgjatë kësaj periudhe, breza të tërë aktorësh, regjisorësh dhe krijuesish kanë kontribuar në zhvillimin e artit skenik, përmes shfaqjeve dhe veprave që kanë lënë gjurmë në historinë kulturore të vendit.
Me rastin e këtij përvjetori është theksuar rëndësia e ruajtjes së trashëgimisë teatrore dhe krijimit të kushteve për zhvillimin e mëtejshëm të artit skenik, si dhe mbështetjes së artistëve dhe krijuesve të rinj.
Teatri Kombëtar i Kosovës vazhdon veprimtarinë e tij në Prishtinë, duke mbajtur një rol të rëndësishëm në promovimin e krijimtarisë teatrore dhe identitetit kulturor të vendit.
