Shërbimi Spitalor Klinik dhe Universitar i Kosovës ka njoftuar se janë zvogëluar listat e pritjes për operacione në Klinikën e Kirurgjisë së Fëmijëve në Qendrën Klinike Universitare të Kosovës.
Në njoftimin e SHSKUK-së në Facebook bëhet e ditur se nga një vit sa ka qenë lista e pritjes, tashmë ajo është reduktuar në më pak se 4 muaj.
Ky rezultat thuhet se është arritur falë përkushtimit nga 14 kirurgët e fëmijëve, anesteziologët dhe stafi tjetër i infermierëve dhe atyre mbështetës.
“Janë zvogëluar listat e pritjes për operacione në Klinikën e Kirurgjisë së Fëmijëve në QKUK. Ky sukses është arritur falë punës, përkushtimit të stafit, por edhe mbështetjet nga institucioni. Derisa dikur lista e pritjes ishte mbi 1 vit, tashmë kjo listë është nën 4 muaj, falë përkushtimit nga 14 kirurgët e fëmijëve, anesteziologët dhe stafi tjetër i infermierëve dhe atyre mbështetës”, thuhet në njoftim.
Më tej theksohet se në nëntë mujorin e parë të këtij viti janë kryer mbi 1 mijë operacione, në vetëm dy salla të operacionit.
“Në nëntë mujorin e parë të këtij viti janë kryer mbi 1 mijë operacione, në dy salla të operacionit, ngase sallat e tjera nuk janë funksionalizuar për shkak të mungesës së anesteziologëve. Salla e tretë përdoret kur ka nevojë për intervenime të Klinikës së Pediatrisë, Mjekimit Intenziv Pediatrik, Neurokirurgjisë, ORL-së dhe klinikave të tjera. Ndërsa në sallën e katërt kanë operuar mjekët amerikanë dhe turqë për rastet kardiokirurgjike tek fëmijët, dhe këto shifra nuk janë përfshirë në numrin e përgjithshëm të operacioneve. Në këtë klinikë ka vazhdimisht progres në zhvillimit e procedurave të reja diagnostike dhe terapeutike, tani punohet edhe me laparoskop një gamë e gjerë e operacioneve, poashtu, litotripsia laserike, ureterorenoskopia, dhe së shpejti fillon endoskopia e traktit”, bëhet e ditur në njoftim./teve1.info/
