Pas daljes nga Prokuroria Speciale, ministrja në detyrë e Tregtisë dhe Industrisë, Rozeta Hajdari, ka reaguar lidhur me hetimet për aferën e rezervave shtetërore, duke akuzuar Prokurorinë për shkelje ligjore në marrjen e dokumenteve të klasifikuara.
Në një deklaratë për media, Hajdari tha se “Prokuroria Speciale nuk ka pasur të drejtë të marrë dokumente sekrete”, duke shtuar se si ministër ka siguruar që informacioni të trajtohet sipas ligjit për mbrojtjen e informacionit dhe vetëm personat me autorizim të AKI-së mund të kenë qasje në to.
“Sot isha e ftuar nga Prokuroria Speciale për intervistë. Bëhet fjalë për kontraktimin e rezervës shtetërore, një proces jetik dhe të ndjeshëm. Ministria e Tregtisë ka bërë blerjen në kohën kur ishim të pambrojtur, në shkurt dhe mars 2022. Pyetja është: a është procesi ligjor dhe si hyri Prokuroria Speciale për të marrë dokumente të klasifikuara? Asnjë person nuk mund të ketë qasje pa procedura në AKI. Ne si ministëri kemi klasifikuar dokumentet sipas ligjit. Prokuroria bëri gabim,” tha Hajdari.
Ajo gjithashtu deklaroi se Inspektorati Policor kishte konstatuar se dy hetues të Prokurorisë kishin shkuar në hetime pa certifikatë sigurie për dokumente sekrete. Sipas saj, “Ky raport u dërgua në Prokurorinë Speciale për udhëzime të mëtejshme ndaj dy policëve, por Prokurori Valdet Gashi i liruar nga përgjegjësia. Prokurori po shkel ligjin,” theksoi Hajdari.
Në deklaratën e saj, Hajdari nuk përmendi përfshirjen e furrtarit Ridvan Muharremi në procesin sekret të rezervës, një fakt që ka ngjallur reagime në opinion.
Hetimet për aferën e rezervave shtetërore vazhdojnë në Prokurorinë Speciale.
