Banka Botërore ka vendosur të largojë Kosovën nga lista e shteteve fragile dhe në situatë konflikti, një zhvillim ky që është përshëndetur nga kryeministri në detyrë, Albin Kurti, si dëshmi e progresit të vendit në fushën ekonomike dhe institucionale.
Në një postim në Facebook, Kurti është shprehur se ky vendim është një vlerësim i qartë i përparimit demokratik dhe të qëndrueshëm të Kosovës.
“Rritjen ekonomike në Kosovë e kemi vënë në shërbim të progresit demokratik, mirëqenies sociale dhe stabilitetit institucional. Kjo u mirënjoh tani edhe me vlerësim nga Banka Botërore, të cilën e falenderojmë për mbështetjen!” theksoi Kurti.
Ky është një ndër vlerësimet më të rëndësishme ndërkombëtare për Kosovën në vitet e fundit, pasi largimi nga lista e shteteve të brishta konsiderohet si një hap i madh drejt konsolidimit institucional dhe forcimit të pozitës së vendit në raportet ndërkombëtare.
