Për shkak të ndërprerjes së grumbullimit të tyre nga kompania rajonale e mbeturinave “Pastrimi”, në gjithë qytetin e Prishtinës u panë grumbuj mbeturinash.
E kryetari i Prishtinës, Përparim Rama ne mbrëmjen e 13 majit, njoftoi se kanë gjetur rrugë alternative në mënyrë që të evitohet kaosi me mbeturina i krijuar në qytet.
Edhe të premten në lagjen “Aktash” u pa se janë ndërmarrë hapa nga niveli lokal për pastrimin e pikave të mbeturinave.
Drejtori i Shërbimeve Publike, Bekim Brestovci, në emisionin “Mesditë” në tëvë1, e quajti gënjeshtër deklarimin e kësaj kompanie për borxh nga Komuna.
“Jap përgjegjësi morale por edhe juridike për çdo pohim që mund të jetë i saktë që Komuna e Prishtinës nuk e ka as edhe një euro të vetme borxh ndaj Kompanisë ‘Pastrimi’… Natyrisht që pretendimet janë të pabaza, thënë shkurt e shqip është një gënjeshtër mbi të cilën është treguar një tregim për t’a justifikuar shantazhin që po i bëhet Komunës së Prishtinës dhe jo për të parën herë nga kompania “Pastrimi”, ka thënë ai.
Ai sërish hodhi akuza ndaj menaxhmentit të kësaj ndërmarrje se për shkak të inateve politike, po sabotojnë punën.
“Kjo gjendje së pari do duhej të trokiste në ndërgjegjen e çdo asambliti të Asamblesë Komunale të cilët vitin e kaluar bënë plotësim ndryshimin e Rregullores dhe vetëm ndërmarrjen Pastrimi e bënë përgjegjëse për krejt menaxhimin e mbeturinave në kryeqytet. Përkundër faktit që ne çdo herë u kemi thënë se është tepër e rrezikshme të bëhet një monopolizim i tillë sepse nëse një ditë ndërmarrja Pastrimi nuk do të jetë në gjendje të ofrojë shërbimin e duhur ndaj qytetarëve atëherë do të kemi një kolaps të cilin e kemi”, u shpreh ai.
Kompania pastrimi ka qene e kontaktuar nga ekipi i televizionit, por qe nuk kane marre pjese ne diskutimin per kete ceshtje ne emisionin mesdita ne teve1.
Sindikata e punëtorëve të kësaj ndërmarrje, kanë njoftuar se do të organizojnë protestë më 19 maj para objektit të Komunës së Prishtinës.
