Një shtetase e Maqedonisë së Veriut është arrestuar nën dyshimin se ka falsifikuar një autorizim, përmes të cilit dyshohet se ka arritur t’i shesë në mënyrë të kundërligjshme dy prona të xhaxhait të saj.
Sipas raportit 24-orësh të Policisë së Kosovës, rasti lidhet me veprime të dyshuara që kanë ndodhur në vitin 2024, në Shtime, ndërsa autorizimi dyshohet se ishte falsifikuar te një noter në Maqedoninë e Veriut.
Rasti është zbuluar pas hetimeve të zhvilluara nga zyrtarët policorë të Drejtorisë për Hetimin e Krimeve Ekonomike dhe Korrupsionit, përkatësisht të Sektorit për Hetime Financiare.
Pas intervistimit, e dyshuara është dërguar në mbajtje me urdhër të prokurorit.
“Pas një pune hetimore, zyrtarë policorë nga Drejtoria për Hetimin e Krimeve Ekonomike dhe Korrupsionit, përkatësisht Sektori për Hetime Financiare, kanë arrestuar të dyshuarën femër shtetase e Maqedonisë së Veriut, e cila pasi që kishte falsifikuar autorizim te një noter në Maqedoninë e Veriut, kishte arrit që në mënyrë të kundërligjshme t’i shiste dy pronat e xhaxhait të saj. E dyshuara pas intervistimit me urdhër të prokurorit dërgohet në mbajtje”, thuhet në raportin 24-orësh.
Rasti mbetet nën hetime.
