Ministrja e Drejtësisë, Albulena Haxhiu ka thënë se fillimi i procesit gjyqësor për vrasjen e Liridona Ademaj është i rëndësishëm për të dërguar mesazh të fuqishëm edhe kundër femicidit.
Ajo ka thënë se do ta ndjekin këtë proces me vëmendje duke uruar që përgjegjësit të marrin dënimin maksimal për krimin e rëndë.
“Ky proces është i rëndësishëm jo vetëm për të vendosur përgjegjësinë për krimin e rëndë, por edhe për të dërguar një mesazh të fuqishëm kundër femicidit. Do të ndjekim me vëmendje çdo hap të këtij procesi dhe urojmë që drejtësia të triumfojë, duke u siguruar që ata që janë përgjegjës të marrin dënimin maksimal për krimin rëndë”, ka shkruar Haxhiu.
Të hënën ishte paraparë të mbahej seanca e parë për këtë rast. Ajo është shtyrë më kërkesën e avokatëve të dy të akuzuarve, Kushtrim Kokalla dhe Tom Dodaj, të cilën kanë thënë se nuk i kanë pasur me kohë shkresat.
Prokuroria kishte ngritur aktakuzë më 15 janar 2025.
Sipas aktakuzës e Naim Murseli dhe Liridona Ademaj sa kanë jetuar në Suedi kanë pasur probleme dhe ç’rregullime martesore dhe probleme pasurore.
Liridona Ademaj u vra mbrëmjen e 29 nëntorit, në hyrje të fshatit Bërrnicë të Prishtinës, teksa po kthehej në shtëpinë e saj me bashkëshortin dhe dy fëmijët.
Rasti fillimisht ishte cilësuar si “Grabitje me pasoja të vrasjes”, duke u bazuar në rrëfimin e Naim Murselit.
Më pas ditën kur u varros Liridona, Policia arrestoi Naim Murselin, Granit Plavën dhe Kushtrim Kokallën, si të dyshuar për involvim në këtë rast./teve1.info/
