Avokati, Visar Rrecaj, ka deklaruar se ka gati 70 vjet që fabrika e municionit është e ndërtuar në Skenderaj.
Sipas tij ajo që duhet të bëjë Qeveria e Kosovës është të dërgojë makinat e reja si dhe të çertifikohet për të prodhuar.
“Qeveria doli dhe tha se jemi duke bërë projekt për të ndërtuar fabrikë të municioneve. Me fal por për të ndërtuar fabrikë nuk ke nevojë se fabrika është e ndërtuar, por ti ke nevojë të çertifikohesh. Fabrikën e municionit e ke qe nja 70 vjet në Skenderaj vetëm duhet të dërgohen makinat e reja. Pra infrastrukturën e ke po si qeveri duhet të çertifikohesh për të prodhuar”, ka thënë ai në emisionin “Këndi i Debatit”, në Tëvë1.
Kryeministri i Kosovës, Albin Kurti, në fillim të mbledhjes të së mërkurës të Qeverisë së Kosovës ka bërë të ditur se ka nisur procesin drejt hapjes së një fabrike për prodhimin e municionit dhe për laboratorë për dizajnim të fluturakeve pa pilotë, të njohur si dronë.
Ndërsa, ministri i Mbrojtjes, Ejup Maqedonci, tha se për këtë projekt janë koordinuar me partnerët ndërkombëtarë, përfshirë SHBA-në, dhe se Ministria e Mbrojtjes e Turqisë ka asistuar me një “raport fizibiliteti”.
