Kryetari i Kuvendit të Kosovës, Glauk Konjufca, të hënën e ka pranuar raportin njëvjeçar të punës së Institutit të Krimeve të Kryera Gjatë Luftës në Kosovë.
Sipas njoftimit gjatë këtij takimi, Konjufca ka theksuar rëndësinë që ka puna e këtij instituti për të dokumentuar të vërtetën e krimeve të luftës së shtetit të Serbisë ndaj shqiptarëve në Kosovë.
Po ashtu bëhet e ditur se ai i ka ofruar institutit mbështetjen e nevojshme në mënyrë që siç thuhet në njoftim të ketë rezultate sa më të mëdha në plotësimin e këtij synimi të rëndësishëm për Kosovën.
“Kryetari i Kuvendit të Republikës së Kosovës, Glauk Konjufca, ka pranuar sot raportin njëvjeçar të punës së Institutit të Krimeve të Kryera Gjatë Luftës në Kosovë. Dorëzimi i raportit u bë nga Drejtori Ekzekutiv i institutit, Atdhe Hetemi. Gjatë këtij takimi, kryekuvendari Konjufca theksoi rëndësinë që ka puna e këtij instituti për të dokumentuar të vërtetën e krimeve të luftës së shtetit të Serbisë ndaj shqiptarëve në Kosovë, duke qenë se kjo i shërben faktimit të historisë, përgjigjes ndaj mohimit dhe fshehjes që Serbia i bën krimeve të saj, si dhe hapjes së rrugës për vendosjen e drejtësisë. Drejtori ekzekutiv, Atdhe Hetemi e njoftoi kryekuvendarin Konjufca me punën e deritanishme të institutit, me sfidat dhe të arriturat që priten në vazhdim. Kryekuvendari Konjufca e përgëzoi drejtorin Hetemi për punën e madhe të bërë deri tani nga ky institut në grumbullimin e materialeve dhe tha se kjo shënon një hap domethënës e të domosdoshëm të faktimit të sistemuar. Duke marrë parasysh ndjeshmërinë dhe rëndësinë e çështjes, kryetari Konjufca ofroi të gjithë mbështetjen e nevojshme ndaj institutit, në mënyrë që të ketë rezultate sa më të mëdha në plotësimin e këtij synimi aq të rëndësishëm për Republikën e Kosovës dhe popullin tonë”, thuhet në njoftim./teve1.info/
