Kurti në një konferencë për media pas takimit me kancelarin gjerman, tha se Komisioni Evropian vite më parë ka konstatuar se Kosova ka mbushur të gjitha kriteret për liberalizimin e vizave, prandaj sipas tij tashmë duhet të ecet përpara në këtë proces.
“Nga kancelari Scholz kërkova që ta shtyjë përpara liberalizimin e vizave për Kosovën, në korrik bëhen 4 vite prej se Komisioni Evropian ka rekomanduar liberalizimin e vizave për Kosovën për herë të dytë, dhe ka konstatuar që Kosova i ka plotësuar të gjitha kriteret. Tash është koha të thuhet se mjaft është mjaft, dhe kjo çështje të vendoset në vendimmarrjen e Këshillit të BE-së pasi që Kosova i ka kryer detyrat e shtëpisë, e është radha që edhe Bashkimi Evropian ta bëjë të njëjtën”, tha Kurti tutje në konferencë.
Po ashtu, ai tha se Pavarësia e Kosovës tashmë duhet të njihet edhe nga 5 vendet e Bashkimit Evropian, që ende nuk e kanë njohur Kosovën.
“Pavarësia e Kosovës duhet të njihet nga sa më shumë vende, duke përfshirë edhe 5 vendet nga Bashkimi Evropian në mënyrë që edhe ato t’i bashkohen 22 shteteve njohëse”, deklaroi ai.
Kurti përmendi edhe suksesin e qeverisë brenda 1 viti në luftimin e kontrabandës, korrupsionit dhe krimit.
“Në këtë vit qeverisje, kemi bërë përpjekje të mëdha për të fuqizuar sundimin e ligjit dhe kemi pasur sukses në luftimin e kontrabandës, korrupsionit dhe të krimit”, tha tutje ai.
