Këshilltari i presidentes Vjosa Osmani, Bekim Kupina i ka reaguar Jetlir Zyberajt të AKR-së që tha sot se ka qenë Osmani e Kurti ata që kanë negociuar që terroristët e Banjskës të largohen.
Kupina tha se Osmani nuk ka negociuar asnjëherë dhe asgjë në dëm të Kosovës e aq më pak lirimin e terroristëve dhe paramilitarëve serb.
Kupina tha se për këtë Osmani do të ndërmarrë veprime ligjore.
“Presidentja nuk ka negociuar asnjëherë dhe asgjë në dëm të Kosovës e aq më pak lirimin e terroristëve dhe paramilitarëve serb, të cilët kanë kryer akt agresioni ngaj Republikës sonë dhe e kanë vra heroin Afrim Bunjaku.
Shpërndarja e propagandës serbe (specialitet i Jetlirit dhe shefit të tij), rrezikon interesat e shtetit tonë dhe sigurinë kombëtare, rrezikon jetën e policëve të tjerë, të cilët çdo ditë po mbrojnë kufijtë e Kosovës si dhe tenton ta njollosë sakrificën sublime të heroit të Kosovës Afrim Bunjaku. Përtej qëllimit të ulët e propagandistik, një deklaratë e tillë përbën shpifje të rëndë dhe nxitje të urretjes për të cilën Presidentja do të ndërmarrë veprime sipas ligjit”, ka thënë ai.
Gjatë ditës Zyberaj ka reaguar pas një takimi të presidentes Vjosa Osmani me djalin e heroit Afrim Bunjaku, që u vra në sulmin e 24 shtatorit të vitit të kaluar në Banjskë.
“Djalin e heroit Afrim Bunjaku shumë mirë që e ke taku. A i tregove që terroristët që ia vranë babën, kanë negociu dhe janë leju prej qeverisë tënde e të Albinit me u largu pa një therë në këmbë?”, ka shkruar Zyberaj në Facebook.