Qeveria e Kosovës ka dërguar në Komisionin Evropian draftin dhe tabelën e plotë të dakorduar të agjendës së reformave mbi Planin e Rritjes.
Këtë e ka bërë të ditur zëvendëskryeministri i Kosovës, Besnik Bislimi.
Ai ka thënë se ky draft shpejtë do të miratohet edhe në Qeveri.
Bislimi ka treguar edhe sektorët kyç në të cilët është fokusuar Kosova.
“Sektorët kyç të prekur e fokusuar janë ato të qeverisjes së mirë dhe administratës publike, tranzicioni drejt energjisë së ripërtëritshme dhe digjitalizimit, zhvillimi i sektorit privat dhe ambientit të të bërit biznes, zhvillimi dhe ruajtja e kapitalit njerëzor, dhe sundimi i ligjit, e ku parashihet realizimi i rreth 30 reformave dhe mbi 100 aktiviteteve, të shtrira përgjatë një periudhe kohore 3 deri në 4 vjeçare”, ka shkruar Bislimi përcjell teve1.info.
Ai ka thënë se hapi radhës është përfundimi i listës së projekteve ku Kosova pritet të përfitojë nga Plani i Rritjes investime në vlerë 945 milionë euro.
“Hapi i radhës është përfundimi i listës së projekteve, e ku puna po vijon në negociata dhe konsultime me institucionet e Bashkimit Evropian. Vendi ynë pritet të përfitojë nga Plani i Rritjes një shumë prej rreth 945 milionë euro, të cilat do shërbejnë në zbatimin e reformave dhe projekteve investive. Kosova në vazhdimësi po shfaq vullnetin e saj jo vetëm për integrim të plotë e sa më parë në familjen evropiane bazuar në norma meritokracie, por edhe gatishmërinë në arritjen e standardeve evropiane e përmbushjen e reformave të nevojshme”, ka shkruar Bislimi.
Ai ka thënë se Kosova është prej vendëve të para në rajon që ka përmbush këtë hap dhe ka dërguar dokumentin në Bashkimin Evropian.
