Prokuroria Themelore në Mitrovicë do të paraqesë kërkesë për caktimin e masës së paraburgimit për Marko Knezhevic, i njohur me nofkën ‘Drug Crni’, nga rrethina e Beogradit, që dyshohet të jetë spiun i Agjencisë së Inteligjencës së Sigurisë serbe (BIA).
Kështu ka bërë të ditur për teve1.info, zëdhënësi i prokurorisë në Mitrovicë, Valon Preteni.
“Personi në fjalë është arrestuar ditën e djeshme dhe me urdhër të prokurorit është dërguar në mbajtje për 48 orë. Gjatë ditës së sotme Prokuroria Themelore e Mitrovicës do të paraqes kërkesë për caktimin e masës së paraburgimit për shkak të kryerjes se veprave penale vjedhje të identiteteve dhe kredencialeve si dhe falsifikim të dokumenteve”, ka thënë ai.
Ndryshe, burime të Tëvë1 bëjnë të ditur se policia dje ka bastisur banesën e tij ku ka jetuar për disa vite, e cila ndodhet në rrugën ‘Vllado Cetkovic’ në veri të Mitrovicës – ku ishte kamufluar si gazetar.
Sipas tyre, në banesë i janë gjetur dhe konfiskuar letërnjoftimi zyrtar që vërteton se është pjesëtar i Ministrisë së Punëve të Brendshme të Serbisë (MPB), dokumente të tjera të MPB-së dhe disa laptopë.
Për televizionin arrestimin e tij e ka konfirmuar, zëvendësdrejtori i policisë për rajonin e veriut, Veton Elshani.