Sulmuesi i Kombëtares së Kosovës, Vedat Muriqi është tejet i emocionuar në prag të finales të Kupës së Spanjës.
Muriqi me padurim po e pret këtë ndeshje, në të cilën Mallorca do të përballet me Athletic Bilbaon. Finalja e Kupës së Spanjës, luhet të shtunën mbrëma në “Estadio de la Cartuja” në Sevillë. Në një intervistë për mediumet spanjolle, Muriqi ka pranuar se këtë javë po e përjeton si një javë speciale dhe me padurim po e pret finalen e së shtunës.
Po ashtu, ai shpreson ta shënoj golin e fitores për Mallorcan, duke ia siguruar trofeun e shumëpritur.
“Muaj më parë kam thënë se dua ta fitoj Kupën me Mallorcan dhe shpresoj që këtë dhuratë t’ua bëjë tifozëve. Trajneri po na flet shumë dhe po na thotë se finalet nuk luhen, por fitohen. Kam pasur shumë ndeshje të rëndësishme në karrierë, por kjo është diçka tjetër. Nëse shënoj golin e fitores do të ishte diçka madhështore”, ka thënë Muriqi.
Sulmuesi, gjithashtu ka insistuar se dëshiron të mbetet pjesë e Mallorcas deri në fund të kontratës së tij. Ai ka kontratë me ekipin spanjoll deri në qershorin e vitit 2027.
“Jam mirë këtu dhe po ndihem rehat me familjen time, që do të thotë se do të mbetem te Mallorca deri në fund të kontratës”, u shpreh Muriqi.
29-vjeçari ka shënuar 5 gola dhe ka bërë 2 asistime këtë edicion në 25 paraqitje në të gjitha garat.