Këtë mesjavë do të zhvillohet edhe xhiroja e fundit e stinorit të rregullt në Superligën e Kosovës në basketboll. Do të luhen vetëm tri ndeshje, dy sot dhe e fundit të enjten.
Një duel tjetër i kësaj xhiroje por që nuk ka pasur ndonjë vlerë, është zhvilluar ditë më parë ku Proton Cable Prizreni mposhti Istogun.
Prej tri ndeshjeve të mesjavës, dy janë tejet interesante pasi Peja dhe Golden Eagle Ylli synojnë që në garat e plejofit të futen nga pozita e dytë në tabelë.
Aktualisht, Ylli është i dyti më 45 pikë, sa i ka edhe Peja në pozitën e tretë por nëse e mbyllin stinorin e rregullt me pikë të barabarta, atëherë pejanët do të dalin të dytët për shkak të bilancit më të mirë në duelet direkte.
Kampionia në fuqi, Peja të mërkurën mbrëma luan në udhëtim te Bashkimi, ndeshje kjo që starton në orën 20:00 në palestrën “Sezai Surroi” në Prizren.
Peja ka shtatë pikë më shumë se Bashkimi që është i gjashti në tabelë dhe në plejof do të luaj në serinë çerekfinale me ekipin që përfundon në pozitën e tretë.
Në tri përballjet e mëparshme të stinorit të rregullt, Peja ka dy fitore karshi një distafe kundër Bashkimit.
Të mërkurën në të njëjtën kohë, luhet edhe ndeshja mes Sigal Prishtinës dhe Vëllaznimit në Gjakovë. Kjo përballje nuk është përcaktuese për renditje në plejof, pasi këto dy skuadra do të përballen me njëra tjetrën edhe në serinë çerekfinale. Pra, Prishtina dhe Vëllaznimi do t’i vazhdojnë duelet mes vete edhe në plejof pasi këto skuadra stinorin e rregullt e mbyllin në pozitat katër dhe pesë.
Xhiroja e 28-të do të mbyllet të enjten prej orës 20:00 me duelin mes Trepçës dhe Yllit që luhet në palestrën “13 Qershori” në Suharekë.
Këto dy skuadra, të dielën u përballen edhe në finalen e Ligës Unike në Vlorë, ku Trepça fitoi në sekondat e fundit. Dy ekipet e para në tabelë në stinorin e rregullt, automatikisht kualifikohen në gjysmëfinale të plejofit, ndërsa katër skuadrat tjera do të përballen në çerekfinale.
Në serinë çerekfinale, skuadrat që realizojnë nga dy fitore, do të avancojnë në gjysmëfinale.