Portieri i Kombëtares së Kosovës, Arijanet Muriq për herën e dytë rresht ka zënë vend në formacionin më të mirë të javës në Premier League të Anglisë.
Muriq ishte në mesin e lojtarëve më të mirë për xhiron e 30-t, të cilët përzgjidhen nga legjenda Alan Shearer. Portieri i Kosovës pati paraqitje fantastike në barazimin e Burnleyt 2:2 kundër Chelseat dhe ishte më i merituari për pikën e arkëtuar nga ekipi i tij.
Muriq pati hiq më pak se 11-të pritje dhe ishte i padiskutueshëm në portën e skuadrës së Burnleyt. Për 25-vjeçarin, kjo ishte vetëm paraqitja e dytë këtë edicion në kampionat dhe për të dytën herë zuri vend në formacionin më të mirë të xhiros.
Ai edhe në xhiron e 29-të ishte pjesë e formacionit më të mirë, pasi me pritjet e tij ia siguroi Burnleyt fitoren 2:1 kundër Brentfordit.
Në dy ndeshjet e fundit që po aktivizohet Muriq në portë, Burnley ka marrë katër pikë dhe aktualisht zë vendin e parafundit në tabelë me 18 pikë të mbledhura.
Në total, Muriq ka 6 paraqitje në të gjitha garat këtë edicion për Burnleyn, ekip me të cilin ka kontratë deri në vitin 2026.
