Nënkryetari i Lidhjes Demokratike të Kosovës, Lutfi Haziri, ka thënë se emisari e BE-së për dialogun Kosovë – Serbi, Miroslav Lajçak, gjatë takimit sot e ka njoftuar opozitën me progresin dhe ngërçin politik që ka dialogu.
Përmes një postimi në Facebook, Haziri ka thënë se pranimi i planit të pesëshes ndërkombëtare, është kthesë në dialog dhe një pritje për progres.
“Sot në emër të LDK-së dhe kryetarit Abdixhiku takova ndërmjetësin ndërkombëtar për Kosovë, z. Miroslav Lajçak, i cili na njoftoi në detaje lidhur me progresin dhe ngërçin politik që ka dialogu për normalizim të raporteve mes Republikës së Kosovës dhe Republikës së Serbisë. Paraqita qëndrimin e LDK-së se dialogu nuk ka opsion dhe që është e vetmja rrugë për zgjidhjen e të gjitha problemeve duke përfshirë njohjen e ndërsjellë. Pranimi i planit të pesëshes ndërkombëtare dhe takimi me liderët evropianë në Bruksel është një kthesë në dialog dhe një pritje për progres”, thuhet në postimin e Hazirit.
Më tej, Haziri është shprehur optimist që në takimin e javës së ardhshme, Kosova dhe Serbia të pajtohen për implementimin e marrëveshjes së Ohrit më 18 mars.
“24 shtatori ka krijuar një ambient të ri politik dhe një ngarkesë të pritur edhe në këtë proces të dialogut”, thuhet në përfundim.
