Los Angeles Lakers janë rikthyer te fitoret në elitën e basketbollit amerikan NBA.
Në ndeshjen e zhvilluar në Crypto Arena, Lakers kanë triumfuar ndaj Orlando Magic me tre pikë diferencë 106:103.
Ka qenë një ndeshje e barabartë prej fillimit deri në fund të saj, por në fund ishte përvoja e vendasve që bëri ta fitonin ndeshjen.
D’Angelo Russell ishte shënuesi më i mirë për Lakers në këtë sfidë pasi realizoi 28 pikë dhe pati tetë asistime.
Me lojë të mirë te skuadra vendase u dalluan edhe Anthony Davis me 26 pikë, 19 kërcime e pesë asistime, derisa LeBron James shtoi 19 pikë të tjera.
Te mysafirët gjashtë basketbollistë shënuan pikë dyshifrore, derisa Gary Harris ishte më efikasi me 17 sosh, por që nuk mjaftuan për fitore.
Fitoren e katërt në po aq ndeshje e ka marrë kampioni në fuqi Denver Nuggets, që ka mposhtur Utah Jazz me tetë pikë diferencë 110:102.
Ndërkohë edhe Dallas Mavericks kanë vazhduar me fitore pasi kanë triumfuar në udhëtim te Memphis Grizzlies me 15 pikë diferencë 110:125.
Bilanc të 100 për qind ka edhe Boston Celtics, që kanë fituar ndeshjen e tretë ndaj Washington Wizards në udhëtim 107:126.
