Tash e katër ditë minatorët e “Trepçës” po vazhdojnë të jenë në grevë nën 800 metra thellësi.
Nënkryetari i Sindikatës së minatorëve të Trepçës, Destan Kërleshi, ka bërë të ditur se gjendja shëndetësore e tyre është e rëndë.
Sipas tij, kjo grevë nuk është politike, dhe nuk është kundër ministrive e as Qeverisë.
“Greva nuk është politike, as nuk është kundër ministrive a as Qeverisë. Kjo grevë është për çështje elementare, siç është paga, sigurimi shëndetësor të cilat për shkak të keqmenxhimit, po kërkojnë që shefin ta shkarkojnë”, tha ai.
Kërleshi, tha se deri në pasditen e sotme janë transportuar gjashtë minatorë në Spitalin Rajonal të Mitrovicës, derisa 43 të tjerë kanë kërkuar ndihmë mjekësore.
“Gjendja e minatorëve është shumë e rëndë, në këto momente gjashtë minatorë janë transportuar në Emergjencë në Spitalin Rajonal të Mitrovicës, kurse 43 të tjerë kanë kërkuar ndihmë mjekësore. Një numër i tyre është dërguar pa vetëdije dhe pas trajtimit mjekësor edhe pse është dashur të pushojnë ata prapë janë kthyer në grevë dhe kanë qëndruar aty me kolegë”, tha ai në emisionin “Ditari” në Tëvë1.
Ai tha se shumica e minatorëve e kanë refuzuar ushqimin edhe pse janë ndihmuar nga donatorë për furnizimin me pije dhe ushqim.
“Një pjesë e tyre edhe pse bordi mbikëqyrës iu ka ofruar ose pije ose ushqim, nuk kanë pranuar. Pra, shumica e tyre e kanë refuzuar edhe ushqimin. Kemi mosha të ndryshme që janë në grevë. Kemi edhe 65-vjeçar që po qëndrojnë aty. Janë të gjitha moshat e përfshira, pa dallim janë bashkë”, deklaroi ai.
Kërleshi, ka bërë thirrje që liderët e qeverisë t’i vizitojnë minatorët dhe të bisedojnë direkt për kërkesat e tyre.
“I kisha bërë lutje qeverisë që të vijë t’i vizitojë dhe të arrijmë një marrëveshje deri te plotësimi i kërkesave të tyre, sepse ndryshe është duke u renduar çdo moment e më shumë”, shtoi ai.
Ai tha se përkundër kësaj minatorët e “Trepçës”, do të vazhdojnë grevën.
Kërleshi, ka përsëritur kërkesat e minatorëve të cilat janë realizimi i pagave me kohë, shkarkimi i menaxhmentit si dhe sigurim shëndetësor./teve1.info/
