Xherdan Shaqiri dhe Granit Xhaka janë përfshirë në listën e përzgjedhësit Murat Yakin, për duelet që Zvicra do t’i ketë në muajin tetor në kualifikime për “Euro 2024”.
Megjithatë, në listën e përzgjedhësit të përfaqësueses helvetike mungojnë Ardon Jashari dhe Uran Bislimi, që ishin të përfshirë për ndeshjet e shtatorit.
“Jemi në pozitë me shumë lojtarë të gatshëm për të luajtur dhe dëshirojmë që të gjithë të kenë minutat e mundshme. Është shumë më e rëndësishme për lojtarët si Jashari apo Fabian Rieder, që ende kanë të drejtë të luajnë për U21, dhe atje mund të luajnë më shumë”, ka thënë Yakin në konferencën për shtyp të mbajtur të premten.
Zvicra, më 12 tetor luan në udhëtim tek Izraeli, ndërsa më 15 tetor e pret në shtëpi Bjellorusinë. Pas ndeshjeve kualifikuese të shtatorit, përzgjedhësi Yakin dhe Granit Xhaka patën biseda rreth deklaratave që i dha kapiteni i Zvicrës dhe mesfushori i Leverkusenit.
Xhaka pas ndeshjes me Kosovën që përfundoi 2:2 në Prishtinë, kishte thënë se nuk janë bërë stërvitjet e duhura dhe lojtarët nuk kanë arritur ta shfaqin maksimumin. Kjo shkaktoi shumë paqartësi rreth të ardhmes së Yakinit.
“Ka pasur shumë biseda rreth kësaj çështjeje. Fokusi është vetëm në skuadrën që kemi dhe ndeshjet që na presin. Të tjerët nuk duhet të na shpërqendrojnë. Nuk ka pasur më shumë diskutime mes grupit dhe Xhakës. Ajo çështje është mbyllur tashmë”, ka thënë Yakin.
Këto ndeshje i takojnë Grupit I kualifikues të Evropianit që vitin tjetër organizohet në Gjermani. Zvicra i prinë grupit me 14 pikë, dy më shumë se Rumania e vendit të dytë dhe tri më shumë se Izraeli i vendit të tretë. Bjellorusia dhe Kosova janë në pozitën e katërt dhe të pestë me nga katër pikë. Andorra është e fundit me dy pikë.
