Alexis Mac Allister është përforcimi i madh i Liverpoolit në repartin e mesfushës gjatë kësaj merkatoje verore.
Titullari i kombëtares argjentinase, u transferua nga Brightoni në “Anfield”, stadium ku do të mbajë veshur fanellën me numër 10.
“Babai im më pyeti se çfarë numri do të zgjidhja. Ishin lirë teta dhe dhjeta, të them të drejtën.
U mendova gjatë dhe në fund zgjodha dhjetën. Sepse teta i përket vetëm Steven Gerrard, i cili ka shkruar historinë me atë numër“, u shpreh 24-vjeçari.
Lojtari i lindur në Santa Rosa, i kushtoi rreth 60 milionë euro Liverpoolit, me Jurgen Klopp që siguroi një përforcim super në mesin e fushës.
Sezoni i fundit ishte fantastik për Mac Allister. I cili fitoi Kupën e Botës me Argjentinën. Por jo vetëm.
Ndërkohë që shkëlqeu edhe me Brightonin. Me skuadrën e De Zerbit që siguroi për herë të parë në histori kualifikimin në një kompeticion europian (Europa League).
“Është e mrekullueshme të jem këtu te Liverpooli. Mezi po pres të zbres në fushë. Dua të bëhem një futbollist më i mirë dhe një njeri më i mirë me kalimin e kohës”, deklaroi Mac Allister pas firmës me The Reds.
