Ai rrugën e bllokuar nga balta po mundohet ta pastrojë. Por nga vërshimet e mbrëmjes së djeshme, baltën nuk po mund ta heqë nga brendia e shtëpisë.
“Jashtëzakonisht ka qenë një tmerr- një tmerr i paparë ndonjëherë. Mirëpo tanë natën jam lutë ‘’Zot mos të ketë viktima’’ e këto tjerat kalojnë. Dëmet janë jashtëzakonisht të mëdhaja…”, thotë ai.
Një dukuri e tillë nuk mbahet mend të ketë ndodhur më parë në Vushtrri thotë 75 vjeçari, Abit Kasumi.
“Kanë ikë kerret i ka marrë uji, i ka mytë pulat e çka ka gjetë. 75 vjet i kam bo kurrë s’ka ndodhë kjo”, thotë Kasumi.
E vërshimet shkaktuan dëme edhe tek bizneset.
Valdet Ukiqi, pronar i një biznesi me sanitari, që nga mëngjesi po e pastron lokalin e tij të vërshuar.
“Komplet lokali është i vërshuar, na ka shkaktu dëme mesatarisht 7-8 / 10 mijë euro janë dëme”, thotë ai.
Shumë mjete nga lokali i tij i hoqi edhe Shukri Mulaku.
“Janë kanë do maqina të huaja më shumë, nja 32 copa mos gabofsha, i kemi qitë në tjetrën anë, prej lokalit i kemi hekë, ujë ka pasë 32-3 cm, atje 40 mrena në atë pjesën tjetër atje, veç 32 metra që është lokali deri në fund ka shku uji”, thotë ai.
Megjithatë ndryshe nga mbrëmë, sipas kryetarit të Komunës së Vushtrrisë, Ferit Idrizi, situata gjatë së enjtes është nën kontroll.
E për dëmet e shkaktuara, Idrizi thekson se do t’i drejtohet Qeverisë.
“Sot është gjendja shumë më e qetë dmth është në suaza të normales. Ekipet tona janë në teren, një pjesë e zjarrfikësve janë duke ndihmu duke pastru bodrumet e ndërtesave të larta, një pjesë tjetër janë nëpër fshatra. Do t’i drejtohemi qeverisë për ndihmë sepse komuna e Vushtrrisë nuk ka mjete për kompensimin e dëmeve e unë besoj që janë bo dëme koxha të mëdha në ekonomitë familjare”, thotë kryetari i Vushtrrisë
Me daljen nga shtrati të lumit Tërstena dhe vërshimeve që ndodhën, kjo komunë të enjten shpalli gjendje emergjente dhe ndërpreu mësimin për dy ditë.
