Me urdhër të Prokurorisë Speciale dje janë bastisur 12 lokacione të ndryshme, prona të 11 zyrtarëve të Ndërmarrjes Publike Banesore e poa ashtu janë sekuestruar dosje, dokumente, telefona e gjësende tjera si prova materiale.
Sipas kësaj prokurorie, ekziston dyshimi i arsyeshëm se është keqpërdorur detyra zyrtare, nga faktet se si janë zhvilluar procedurat e përshpejtuara për ndërtimin e katër objekteve afariste dhe banesore, vlera e të cilave kalon 120 milionë euro.
Këtë aksion e ka përshëndetur Lëvizja Vetëvendosje, dega në Prishtinë.
VV-ja në këtë qytet ka thënë se ka dy vite qëkur këtë çështje “e ka ngritur si shqetësim dhe ka sinjalizuar për këtë projekt që dëmton interesin publik”.
“Me 8 gusht të vitit të kaluar kemi ngritur Padi ndaj NPB-së dhe operatorëve ekonomik që janë të përfshirë në këtë aferë dhe gjithashtu kemi kërkuar nga Gjykata vendosjen e masës së përkohshme. Përkundër provave të mjaftueshme që kemi deponuar dhe pas pritjes së pakuptimtë prej 71 ditësh për mbajtjen e seancës, kërkesa jonë për masë të përkohshme ishte refuzuar. Organet e drejtësisë hezituan gjatë për vepruar në këtë rast, edhe pse faktet ishin të qarta. Aksioni dhe veprimet e djeshme të Policisë së Kosovës e dëshmojnë qartë se veprimet që i kemi ndërmarrë gjatë gjithë kësaj kohe kanë qenë të drejta dhe të argumentuara”, thuhet në njoftimin e kësaj partie.
Po ashtu VV ka kërkuar nga organet kompetente që rasti të trajtohet me seriozitetin më të lartë dhe përgjegjësit të japin llogari për veprat e tyre.
Tutje kjo parti thotë se është shqetësuese heshtja e vazhdueshme e qeverisjes komunale për këtë çështje.
“As në Kuvendin Komunal nuk na është mundësuar të diskutojmë për këtë problematikë, ndërkohë që pikërisht ky Kuvend është themelues dhe aksionar i vetëm i NPB-së. E pse ka ndodhur kjo, edhe këtu duhet të ketë hetim”, thuhet në komunikatë.