Ministrja e Punëve të Jashtme të Kosovës, Donika Gërvalla, pasi që Komiteti i Ministrave të shteteve anëtare me mbi dy të tretat e votave i ka dhënë sot mbështetje aplikimit të Kosovës në KE, ka thënë se për Kosovën ky vendim i sotëm përbën një hap historik, duke shtuar se ndoshta më të rëndësishmin pas pavarësisë.
Sipas Gërvallës, me këtë vendim përmbyllet një etapë e rëndësishme drejt anëtarësimit të plotë.
Ajo ka thënë se mbetet shumë punë për të bërë, dhe procesi i anëtarësimit është i gjatë dhe plot sfida.
“Mbetet edhe shumë punë për të bërë. Procesi i anëtarësimit është i gjatë dhe plot sfida. Por Republika e Kosovës në fund të procesit do ta zërë vendin e saj të merituar si anëtare e Këshillit të Evropës”, ka shkruar ajo në një postim në Facebook.
Ministrja ka falënderuar shtetet të cilat nuk e kanë njohur formalisht Kosovës, por që nuk e kanë bllokuar anëtarësimin,
“Nuk mund të lë pa falënderuar Shtetet e Bashkuara të Amerikës, të cilat përsëri dëshmuan të jenë aleati më i rëndësishëm i Republikës së Kosovës, dhe të cilat na mbështetën fuqishëm në dialogun tonë me një numër të madh të shteteve anëtare të Këshillit të Evropës. Falënderim i posaçëm i takon grupit ndërinstitucional të përbërë nga Zyra e Presidentes, Zyra e Kryetarit të Kuvendit, Zyra e Kryeministrit, dhe MPJD-ja, i cili udhëhiqet nga zëvendësministri Kreshnik Ahmeti, delegacionit të Kuvendit të Republikës së Kosovës në Këshillin e Evropës, i cili udhëhiqet nga zëvendëskryetarja e Kuvendit, znj. Saranda Bogujevci, ekipit të Konsullatës së Përgjithshme të Republikës së Kosovës në Strasburg, e cila udhëhiqet nga ambasadori Lulzim Hiseni si dhe të gjithë atyre që kontribuan sado pak për këtë ditë të rëndësishme”, ka shkruar Gërvalla tutje.
Përfund ministrja ka e ka cekur se ka shumë punë për të bërë, shumë sfida për të përballuar, por që sipas saj dita e sotme meriton të festohet denjësisht. /teve1.info/
