Rreshteri i Forcave të Sigurisë së Kosovës, Musa Gashi, rrëfeu se si i kanë kaluar rreth dy javë të ndihmës së tyre në misionin e kërkim-shpëtimit, të të mbijetuarve dhe viktimave të tërmetit në Turqi.
Madje, Gashi tregoi se përkundër rrezikut që kanë hasur atje, përsëri me çdo kusht donin t’i shpëtonin njerëzit e mbetur nën rrënoja.
“Kanë qenë dy javë shumë të vështira, mirëpo që na kanë bërë të ndihemi me emocione të ndryshme. Në qytetin ku kemi qenë në aksion, nuk ka pasur shtëpi apo ndërtesë që nuk ka qenë e dëmtuar. Dy javë shumë të vështira, por do të thoja që për ne ka qenë mësim tej mase. Për kundër rrezikut që e kemi pasur, me çdo kusht ne donim t’i shpëtonim ata. Prandaj, kemi thënë që s’duhet të humbim kohë më shumë për të filluar punën tonë, në mënyrë që të bëjmë më të mirën e mundshme për popullin e Turqisë”, deklaroi Gashi në emisionin “Ditari”.
I pyetur se si pjesëtarët e FSK-së e kanë nisur ditën atje, Gashi tha se Agjencioni i Menaxhimit të Emergjencave që udhëheq katastrofat në Turqi, u kanë dërguar çdo ditë koordinatat për të kuptuar në cilin vend do të shkojnë.
“Fillimisht kemi bërë kërkimet tona me qen, pastaj me pajisjet tona akustike”, shtoi tutje ai.
Derisa, nën emocione, Gashi përshkroi edhe momentin kur ekipi i FSK-së ka arritur t’i shpëtojë nga rrënojat një 2-vjeçare dhe nënën e saj, përcjell teve1.info.
“Zërin e saj e kemi dëgjuar si kemi shkuar atje me pajisjet tona specialistike, zëri i saj na ka bërë që të shpejtojmë sa më shpejtë të gjejmë rrugën që ta shpëtojmë atë. Për shkak se ne e dinim rëndësinë e kohës në fatkeqësi të tilla. Rruga ka qenë më e rrezikshme, por që i kemi injoruar ato rreziqe që kanë qenë për shpëtimin e vajzës 2-vjeçare. Momenti kur e kemi tërhequr ka qenë i papërshkruar, ka qenë moment shumë emocional, prandaj të gjithë ne e kishim të pamundur t’i mbanim emocionet. Kemi pasur edhe lot gëzimi”, tregoi tutje Gashi.
Ndërkaq, kujtojmë se tërmeti prej 7,8 shkallësh që ka goditur Turqinë dhe Sirinë në mëngjesin e 6 shkurtit ka lënë të vdekur rreth 43 mijë persona./teve1.info/.
