Profesori i së drejtës kushtetuese, Ditar Kabashi, ka komentuar mundësinë e zbatimit të ndryshimeve në Ligjin për Dhomat e Specializuara dhe Zyrën e Prokurorit të Specializuar, të miratuara nga Kuvendi i Kosovës më 6 tetor.
Në emisionin “Info Nata” në Tëvë1, Kabashi ka theksuar se çdo ligj duhet të miratohet sipas procedurave të përcaktuara me legjislacionin në fuqi, ndërsa ndryshimet ligjore duhet të bëhen përmes rrugës së njëjtë juridike nëpër të cilën është miratuar ligji përkatës.
Ai ka thënë se, ndonëse janë të kuptueshme kërkesat dhe dëshirat e qytetarëve për një proces të drejtë ndaj ish-krerëve të Ushtrisë Çlirimtare të Kosovës, procedurat juridike duhet të respektohen.
“Secili ligj duhet të dalë sipas një procedure të cilën e parasheh legjislacioni. Janë të kuptueshme kërkesat e dëshirat e qytetarëve që të ketë proces të drejtë për ish-krerët e UÇK-së, mirëpo megjithatë procedurat juridike janë ato që duhet ndjekur. Ato mund të ndryshohen vetëm në rrugën në të cilën janë hartuar”, ka deklaruar Kabashi.
Profesori ka përmendur edhe disa çështje që, sipas tij, mund të kontestohen në aspektin juridik.
Ndër to ka veçuar aspektin procedural, që lidhet me afatin dhe shmangien e afatit prej 72 orësh për leximin e dytë, si dhe çështje të tjera që kanë të bëjnë me kompetencat e Gjykatës Kushtetuese dhe fushëveprimin e shqyrtimit të rasteve nga kjo gjykatë.
“Në këtë kontekst janë disa çështje të cilat mund të kontestohen në procedurën e nxjerrjes së ligjit. E para ka të bëjë në aspektin procedural, lidhur me afatin dhe shmangien e afatit 72-orësh për leximin e dytë, ndërsa janë edhe disa çështje të tjera të cilat lidhen me kompetencën e Gjykatës Kushtetuese dhe domenin e vlerësimit apo shqyrtimit të rasteve të cilat i ka ajo gjykatë”, ka thënë ai.
Kabashi ka shtuar se këto çështje kërkojnë diskutim dhe vlerësim në kontekstin juridik.
Ndryshe, Kuvendi i Kosovës i miratoi më 6 tetor ndryshimet në Ligjin për Dhomat e Specializuara dhe Zyrën e Prokurorit të Specializuar, pasi katër ish-krerë të Ushtrisë Çlirimtare të Kosovës u dënuan më 16 shtator me gjithsej 81 vjet burgim për krime lufte./teve1.info/
