Gjithsej 32 sportistë do ta përfaqësojnë Kosovën në Festivalin Olimpik Evropian për të Rinj që prej 20 deri më 26 korrik mbahet në Shkup, ka njoftuar Komiteti Olimpik i Kosovës (KOK).
Festivali është garë e nivelit të lartë për sportistët e grupmoshës prej 14 deri në 18 vjet dhe vlerësohet gara kryesore e vitit për këtë grupmoshë.
Kosovën do ta përfaqësojnë 18 vajza dhe 14 djem, që do të garojnë në 9 sporte të ndryshme, si xhudo, atletikë, çiklizëm, gjimnastikë, taekëondo, badminton, not, pingpong dhe shenjëtari.
Kosova merr pjesë në Festivalin Evropian për herë të pestë pas debutimit në Tbilisi në vitin 2015.
Medaljen e vetme deri më tani e ka fituar atleti Muhamet Ramadani në “Baku 2019”, ku fitoi të artën në hedhje të gjyles.
Në Shkup mbahet edicioni i 18-të i Festivalit Olimpik Veror për të Rinj dhe do të garojnë mijëra sportistë nga 49 vende të ndryshme.
Gara do të mbahen edhe në Kumanovë, ndërsa gara e gjimnastikës zhvillohet në Osijek të Kroacisë.
