Të mërkurën erdhi nga Peja në Prishtinë.
Pas pak minutash, Albina Krasniqi do ta shoh edhe një herë, ish-fqinjin serb në Pallatin e Drejtësisë.
Ky i fundit, që në gjykatë u fut larg syrit të medieve, ndodhet në bankën e të akuzuarit për krime lufte në fshatin Ozdrim të Pejës.
Krasniqi thotë se është e bindur se Millorad Gjokoviq, është fajtor për vrasjen e gjashtë anëtarëve të familjes së saj.
“Ne jemi kanë pak më të rijnë si kemi kuptuar shumë gjërat, por po ka qenë fqinjë i joni e unë jam e bindur që ky ka pasur dorë në vrasje me plot bindje e them këtë”, tha Albina Krasniqi.
E gjithë ngjarja ndodhi në majin e vitit 1999, kur ushtria e rregullt serbe dhe grupet paramilitare, hynë në Ozdrim të Pejës.
Ndërsa lajmin e kobshëm pas ngjarjes, Albina Krasnqit ia kumtoi djali i axhës.
“Krimet e luftës që na kanë shkatërrua, emocionalisht, shpirtnisht s’di as si me shpjegua. Skam pasur komunikim një kohë me ta, kam kuptua prej djalit të axhës, sa është e rëndë nuk mundem me përshkrua. Është një dhimbje që nuk hiqet kurrë në jetë”, shprehet ajo.
E momenti që e priti për 27 vjet, erdhi të mërkurën.
Gjykata Themelore në Prishtinë, e shpalli fajtor Millorad Gjokoviqin dhe e dënoi me 10 vite burgim.
“Gjykata shpall këtë aktgjykim: Në emër të popullit, i akuzuari Milorad Gjokoviq shpallet fajtor, sepse në periudhën e luftës në Kosovë, më 7 maj 1999, në fshatin Ozdrim, Komuna e Pejës, i akuzuari, në cilësinë e policit rezervë, me persona të tjerë, i ka shkelur rregullat e së drejtës ndërkombëtare gjatë kohës së luftë. Gjykata, në bazë të dispozitave të Ligjit Penal të ish-Jugosllavisë, të akuzuarin e dënon me 10 vjet burgim, ku do t’i llogaritet edhe koha e paraburgimit, u shpreh kryetarja e trupit gjykues, Donikë Shala -Abdyli.
Por, ky vendim nuk ishte ai që e priti Albina Krasniqi.
“Nuk e kam pritë mirë vendimin, është shumë i dështuar kam prit me u dënua me vdekje, me u dënua për vrasjet që i ka bë. Unë kufomat nuk i kam kurgjo diçka më shumë nuk kam lyp veç të i dijë kufomat e tyre”, shprehet e dëshpëruar ajo.
Të pakënaqur që ish-policit serb, iu dhanë vetëm 10 vjet burgim u shprehen edhe dëshmitarët e krimeve të tij.
“Asnjë dënim nuk mund të kthejë jetën e atyre që u morën padrejtësisht, por triumfi i së vërtetës është obligim. Për vrasje asnjë ditë dënim, gjykata nuk e dha. Shumë dobët, nuk e di çfarë dënimi është ky. Qesharak. Ku është drejtësia, ku janë vrasjet, kufomat?! Kemi bërë obduksionin e tyre, i kemi nxjerrë nga varrezat. Më 8 korrik 2022, ashtu ekspertiza është dalë, me dy plumba të vrarë, dy persona i kam të vrarë në të njëjtin vend. I njëjti vrasës, ato nuk janë marrë për bazë”, tha Halit Gashi-dëshmitar.
Ndryshe, vet Millorad Gjokoviq, gjatë procesit gjyqësor ishte deklaruar i pafajshëm.
