Zyra e Rregullatorit për Energji (ZRrE) ka njoftuar se kërkesat për pezullimin e njoftimit për hapjen e tregut të energjisë elektrike janë refuzuar nga gjykatat kompetente, duke konfirmuar ligjshmërinë e këtij procesi.
Sipas ZRrE-së, pas hyrjes në fuqi të dispozitave ligjore që rregullojnë liberalizimin e tregut të energjisë, disa konsumatorë individualë dhe përfaqësues të odave ekonomike kishin paraqitur padi në Gjykatën Komerciale dhe Gjykatën Themelore, duke kërkuar pezullimin e njoftimit publik për liberalizim.
Megjithatë, Gjykata Themelore në Prishtinë, përmes aktvendimit të datës 19 qershor 2025, ka refuzuar kërkesën për masë sigurie të paraqitur nga Dhoma e Tregtisë dhe Industrisë së Kosovës, duke vlerësuar se njoftimi i ZRrE-së kishte karakter informues dhe jo detyrues.
ZRrE ka bërë të ditur se deri më tani është miratuar vetëm një kërkesë individuale për pezullim, lidhur me kriteret për furnizim brenda shërbimit universal. Kjo, sipas institucionit, nuk ndikon në vijimin e procesit të liberalizimit të tregut.
Institucioni ka njoftuar se do të shfrytëzojë të drejtën e ankesës në instancat më të larta gjyqësore, për të mbrojtur zbatimin e reformave dhe ligjshmërinë në sektorin e energjisë, në përputhje me Ligjin Nr. 05/L-085 për Energjinë Elektrike.
ZRrE rithekson se liberalizimi i tregut të energjisë është i detyrueshëm vetëm për ato ndërmarrje që kanë më shumë se 50 të punësuar apo qarkullim vjetor mbi 10 milionë euro.
“ZRrE mbetet e përkushtuar për të garantuar një treg funksional, konkurrues dhe të drejtë për të gjithë pjesëmarrësit në sektorin e energjisë”, thuhet në njoftimin e tyre.
