Ora 10:00 i gjeti dhjetëra media në sallën e mbledhjeve të Zyrës së Rregullatorit të Energjisë.
Kjo pasi që pikërisht në këtë takim do të merrej një vendim i rëndësishëm për qytetarët e Kosovës.
Por, mbledhja nuk nisi në orën e paraparë.
Pas një vonese disa minutëshe nisën punimet.
Fillimisht u miratuan të hyrat maksimale të lejuara për operatorët energjetikë.
Kryesuesi i Bordit të ZRrE-së, Ymer Fejzullahu, tha se pas vlerësimit nga stafi i tyre dhe raporteve konsultative kanë arritur që të zbresin të hyrat e lejuara maksimale për këta operatorë.
“Është mirë me potencuar se pjesa e OSSH-së, pjesa e KEDS-it ka qenë 214 milionë euro, mirëpo pas vlerësimit nga ana e ZRRE-së kjo kërkesë është zbritur nga 214 milionë euro në 180 milionë euro pas shqyrtimit nga ana e stafit në raportin konsultativ dhe përgjigjeve të komenteve si version final… Kërkesa (KESCO)ka qenë rreth 447 milionë euro, por pas vlerësimit të stafit në këtë proces kemi ardhur në vlerën e 435 milionë euro, pas diskutimeve që kemi pasur me të gjitha palët e interesit”, tha Ymer Fejzullahu, kryesues i Bordit të ZRrE-së.
Megjithatë, ai nuk pranoi të jep një përqindje të saktë për rritjen e energjisë elektrike në vitin 2025, përkundër insistimit të madh të mediave.
Ndërkaq, drejtori menaxhues i ZRrE-së, Petrit Pepaj, tregoi shkaktarët që sipas tij po rritet kostoja e shërbimit të energjisë elektrike.
“I kemi katër shkaktarë që kanë ndikuar në rritjen e kostos së shërbimit. Janë ndryshimet në koston e blerjes të energjisë elektrike nga furnizuesi me shërbim universal. Ndryshimet me kostos së blerjes së energjisë nga operatori i sistemit të shpërndarjes. Parashikimi i çmimeve të energjisë nga importi për vitin 2025 dhe parashikimi për koston e shërbimeve ndihmëse për operatorin e sistemit të transmetimit. Në vlerësimet për vitin 2025 është parashikuar edhe import duke pasur parasysh se njësit gjeneruese janë në planifikim të mirëmbajtjes”, tha drejtori menaxhues i ZRrE-së, Petrit Pepaj.
Pavarësisht insistimit të gazetarëve në lidhje me përqindjen e rritjes së çmimit të energjisë, Pepaj nuk pranoi pyetjet të gazetarëve.
“S’ka pyetje. Ju përgjigjemi me shkrim”.
Madje në një moment, kryesuesi i bordit të ZRrE-së, Ymer Fejzullahu, kërkoi nga mediat të largohen nga mbledhja e bordit, meqë tha që do të diskutojnë për komentet që kanë dërguar qytetarët.
Rreth dy orë pas kësaj mbledhje ZRRE doli më një komunikatë për media.
Aty, konfirmoi rritjen e çmimit të rrymës për 16 për qind për të gjitha kategoritë e konsumatorëve.
Përmes një komunikatë pas mbledhjes së Bordit, ZRRE ka publikuar edhe me shkrim kërkesat e miratuara të tre operatorëve energjetikë.
Më herët, ZRRE-ja njoftoi se tarifat e reja do të hynin në fuqi më 1 maj.
