Është dita e dytë që po angazhohen maksimalisht në shuarjen e zjarrit.
Por nga erërat, fikja e flakëve në fshatin Siqevë të Prishtinës po bëhet e vështirë.
Pavarësisht nga kjo, zjarrfikësit nuk po heqin dorë nga detyra e tyre.
E para syve të Musli Berishës, rreth pesë hektarë tokë janë duke u djegur.
Gjithë kjo situatë, për pronarin e tokës është shqetësuese.
“Atje nalt kam pasë dardha, molla, qershia krejt të shartume edhe janë djeg krejt ato, nuk mujnë me gjallnu. Kryesore shpiat me na shpëtu, mali është dhimtë po s’ki çka i bën”, shprehet Berisha.
Por këto male nuk janë zona më e madhe që janë përfshirë nga flakët.
“Për nga intensiteti dhe sipërfaqja që është përfshi ka qenë zjarri këtu në Emshir, pra që ka përfshi një sipërfaqe tejet të madhe prej Emshirit deri në Fushë Kosovë edhe në Veternik”, tregon Mal Gashi nga brigada e zjarrfikësve në Prishtinë.
E nga Agjencia e Menaxhimit Emergjent u bë e ditur se tri ditët e fundit janë evidentuar rreth 300 raste të zjarreve.
Drejtori ekzekutiv i Agjencisë së Menaxhimit Emergjent të MPB-së, Genc Metaj deklaroi se gjendja aktuale lidhur me zjarret paraqet rrezik serioz dhe shkaqet kryesisht dyshohet të jenë dora e njeriut.
Andaj ekspertët e emergjencave kanë një thirrje për qytetarët meqë e vlerësojnë gjendjet si jo normale.
“Me inicimin e zjarrit që shkakton rrezikim të përgjithshëm kryhet vepër penale dhe si e tillë sanksionohet edhe me burgim. Andaj duhet të jenë të kujdesshëm sepse përveç që po i dëmtojnë pyjet e shumta, po dëmtohet ambienti”, shprehet Tahir Ahmeti.
Tentimet e zjarrfikësve për të shuar zjarrin në fshatin Siqevë të Prishtinë kanë vazhduar përgjatë gjithë ditës së hënë.
