Zjarre të fuqishme pyjore kanë përfshirë disa zona të Turqisë, duke shkaktuar evakuime të banorëve dhe ndërprerje të qarkullimit në disa akse rrugore.
Një nga zonat më të prekura është provinca Mugla, ku për shkak të flakëve dhe tymit të dendur është mbyllur përkohësisht autostrada që lidh Fethiye me Antalyan.
Autoritetet turke kanë bërë të ditur se deri tani janë evakuuar 43 familje, përkatësisht 65 persona, për shkak të rrezikut nga përhapja e zjarreve.
Flakët kanë prekur gjithashtu zona në distriktin Edremit të Balıkesirit dhe në rrethin e Alanyas, ku ekipet emergjente po punojnë për kontrollimin e situatës.
Operacionet për shuarjen e zjarreve po zhvillohen si nga toka, ashtu edhe nga ajri, me përfshirjen e ekipeve zjarrfikëse dhe mjeteve ajrore.
Autoritetet kanë paralajmëruar se erërat e forta po e vështirësojnë punën e ekipeve në terren dhe po ndikojnë në përhapjen e flakëve.
Puna për lokalizimin e zjarreve dhe mbrojtjen e zonave të banuara po vazhdon.
