Një zjarr i madh ka përfshirë gjatë ditës së mërkurë një fabrikë të metalit në qytetin e Gjakovës.
Pas shpërthimit të flakëve, në vendin e ngjarjes kanë intervenuar njësitë e Njësisë Profesionale të Zjarrfikësve dhe Shpëtimit në Gjakovë, të cilat kanë punuar për shuarjen e zjarrit dhe parandalimin e përhapjes së tij.
“Falë reagimit të shpejtë dhe angazhimit të ekipeve tona, zjarri është lokalizuar dhe është shuar në kohë, duke parandaluar përhapjen e mëtejshme të flakëve dhe dëme edhe më të mëdha materiale”, thuhet në njoftimin e zjarrfikësve.
Sipas tyre, nga ky incident nuk është raportuar për persona të lënduar.
Ndërkohë, shkaqet që çuan deri te përfshirja e fabrikës nga zjarri mbeten për t’u hetuar nga organet kompetente.
