Zgjedhjet e fundit lokale u bojkotuan nga qytetarët serbë në katër komunat veriore.
Bojkoti i tyre i hapi rrugë partive shqiptare që të udhëheqin me Mitrovicën e Veriut, Zveçanin, Zubin Potokun e Leposaviqin.
Mirëpo, në zgjedhjet e 12 tetorit qytetarët serbë pritet t’iu drejtohen kutive të votimit.
Drejtori i organizatës AKTIV në veri të Mitrovicës, Miodrag Miliçeviq, tregon se serbët do të marrin pjesë në këto zgjedhje dhe do të kenë më shumë opsione se për kë mund të votojnë.
“Shoh interes më të madh tek serbët për të marrë pjesë në këto zgjedhje të 12 tetorit. Përveç Listës Serbe pjesë e garës janë edhe disa parti të tjera politike që nënkupton se qytetarët do të kenë më shumë opsione për të votuar. Serbët e kanë kuptuar se ishte gabim i madh largimi nga institucionet. Shpresoj që procesi i zgjedhjeve të shkoj mirë”, deklaroi Miliçeviq.
Kurse nënkryetari i Kuvendit Komunal të Mitrovicës së Veriut, Skender Sadiku, thotë tani ka më shumë pluralizëm politik në veri, dhe Lista Serbe mund të sfidohet nga partitë e tjera.
“Shoqëria serbe në veri po demokratizohet sepse tani ka disa parti që po garojnë në zgjedhjet lokale. Gara po bëhet edhe më atraktive me pjesëmarrjen e partive shqiptare dhe boshnjake”, deklaroi Sadiku.
Tutje, Sadiku e sheh si të papranueshme që Serbia të ndërhyjë në këto zgjedhje tek komuniteti serb.
“Ndërhyrjet e jashtme nuk janë të mira për komunitetin serb dhe për Republikën e Kosovës. Serbët e Kosovës duhet të zgjedhin pa ndikim se nga kush dëshirojnë të përfaqësohen”.
Në të kaluarën, Misioni Monitorues i Bashkimit Evropian në Kosovë ka konstatuar në disa raste në raportet e tij se Lista Serbe ka monopolizuar jetën politike midis serbëve të Kosovës.
