Këshilli i Bashkimit Evropian ka vendosur të zgjasë mandatin e Misionit të BE-së për Sundimin e Ligjit në Kosovë (EULEX) deri më 14 qershor 2027.
Mandati aktual i EULEX-it ishte paraparë të përfundonte më 14 qershor të këtij viti.
Sipas komunikatës zyrtare, vendimi për zgjatjen e mandatit është pjesë e shqyrtimit strategjik të misionit në terren. Në dokument theksohet se:
“Në kuadër të shqyrtimit strategjik të EULEX Kosovo, Komiteti Politik dhe i Sigurisë ra dakord që mandati i Misionit të zgjatet deri më 14 qershor 2027. Asgjë në këtë vendim nuk duhet të interpretohet si ndërhyrje në pavarësinë dhe autonominë e gjyqtarëve dhe prokurorëve që veprojnë në kuadër të procedurave gjyqësore në kontekstin e EULEX Kosovo.”
Për periudhën e re dyvjeçare, nga 15 qershori 2025 deri më 14 qershor 2027, Bashkimi Evropian ka ndarë një buxhet prej 170,866,980 eurosh për mbulimin e shpenzimeve të misionit.
