Kryeministri i Kosovës, Albin Kurti, ka emëruar zëvendëskryeministren e dytë dhe ministren e Drejtësisë, Donika Gërvalla-Schwarz, në pozitën e Koordinatores Kombëtare për mbrojtje nga dhuna në familje, dhuna ndaj grave dhe dhuna në baza gjinore.
Kurti në Facebook tha se ky emërim synon të forcojë përkushtimin institucional për parandalimin dhe adresimin e dhunës, duke e trajtuar atë si çështje të sigurisë njerëzore dhe të drejtave themelore.
Kurti theksoi gjithashtu miratimin e ligjit për kompensimin e viktimave të krimit dhe avancimin e kornizës ligjore, duke shtuar se dhuna ndaj grave tashmë është e sanksionuar si vepër penale në Kodin Penal.
Sipas tij, për personat që shpallen fajtorë për dhunë në familje dhe dhunim seksual janë vendosur edhe dënime plotësuese, si dhe prioritet për hetimin dhe gjykimin e këtyre rasteve.
“Ministres Gërvalla-Schwarz i urova suksese në këtë detyrë me rëndësi të veçantë, duke shprehur besimin se me përkushtimin dhe përgjegjësinë institucionale që kërkon kjo pozitë do të vazhdohet forcimi i mekanizmave për mbrojtjen e grave dhe vajzave nga çdo formë dhune”, ka shkruar Kurti.
